Эрттегили музыка школ жангы бет аллыкъды

Нальчикде Къабарты орамны эрттегили мекямында орналгъан 2-чи номерли сабий музыка школгъа тынгылы ремонт этиле турады. Аны жылны ахырына бошаргъа белгиленеди. Алай бла, бу эрттегили маданият учреждение кесини 60-жыллыгъын жангыртылгъан мекямда тюберикди.

Мында ремонт ишле «Маданият» миллет проектге кёре бардырыладыла. Мекямны ал бети кирпичи ачылгъынчы тазаланнганды, башы да жангыртылгъанды, жылыу баргъан быргъыла, ток ызла, эшиклери, поллары да кетерилгендиле – аланы барысын да алышдырмай боллукъ тюйюлдю. Кабинетле тышындан таууш эшитилмезча этилгендиле, къабыргъалары шёндюгю материалла бла сюртюлгендиле, акълау ишле да башланнгандыла. Жууукъ заманлада къурулушчула школну тийресин тапландырыуну эмда тёгерегинде бурууну алышындырыуну къолгъа аллыкъдыла.

Проектге кёре, дагъыда музыкалы школгъа , алгъынча, Къабарты орамдан кирирча этилликди. Мекямны ал бети чыракъла бла жасаллыкъды.

1962 жылда, мында школ ачылгъан заманда,  29 адам жюрюгенди. Бюгюнлюкде анда 400-ден аслам сабий музыка жаны бла окъуйду, фортепианону, къыл къобузланы, халкъ чыгъармаланы, тюрлю-тюрлю инструментлени бёлюмлери бардыла. Бери жюрюгенлени асламысы музыкалы конкурслада хорлам болдурадыла неда алчы жерлеге чыгъадыла. Быйылны алсакъ окъуна, озгъан айлада жаш музыкантла школларына 32 диплом келтиргендиле.

Эсгертиу: республикада искусство жаны бла 28 сабий школ барды, аладан 12-си жангыртылгъанды. Энди ала аз-аздан керекли затла бла , ол санда жангы музыкалы инструментле бла, жалчытылынырыкъдыла.