«Манга саусузланы ышаныулары эмда ыспаслары неден да багъалыды»

«Ол кесини ишин уста билген адамды деселе, анга сукъланырыгъынг окъуна келеди. Аллайла уа, насыпха, арабызда  аз тюйюлдюле. Ала  чемерликлерин, акъылларын жаланда кеслери хайырланып къалмай, ол байлыкълары бла къатларындагъыланы, алларына ышанып келгенлени да къууандырадыла. Ма аллайладан бирини юсюнден  газетибизде  жазарыгъызны бек тилейме. Мен ыразылыгъымы билдирирге сюйген адам а Къалабекланы Халимни къызы Эльмирады. Ол 4-чю номерли поликлиникада кюндюзгю стационарны баш врачыды. Тилегими толтурсагъыз бек ыразы этериксиз», – деп жазгъанды редакциягъа  Хасанияда 16-чы номерли мектепде  устаз болуп ишлеген  Темуккуланы Светлана Мачраиловна.

Къалабекланы Эльмираны  юсюнден махтау сёзле башхаладан да  эшите тургъанма. Окъуучубузну тилегин толтурур муратда, эрттенликде поликлиникагъа барама. Эшикни къагъып, баш врачны  кабинетине киреме. Ол а, олсагъат ёрге туруп, манга соруулу къарайды. Не жумуш бла келгеними айтама. Ол ийменеди. «Аллай бир не этеме, мени юсюмден жазарча»,– дейди. Болсада  сорууларымы берип башлайма да, къысха жууапла алама.

Мен билгенликден, Эльмира бери  КъМКъУ-ну медицина факультетин, ызы бла ординатураны, интернатураны да бошагъандан сора келгенди. Жигер  къызны кеси бла бирге ишлерге уа  КъМР-ни сыйлы врачы, поликлиникагъа  ол заманда башчылыкъ этген Руслан Кешоков чакъыргъан эди. Баш врач   кюндюзгю стационар ачылгъанын, аны  уа ишин биринчи кюнден окъуна тынгылы къурап бардырыргъа кереклисин айтады.  

Биринчи заманлада къыз къоркъаракъ болгъан эсе да, аз-аздан хар затны эбине тюшюннгенди. Анга  медицина факультетде  ахшы белгилеге окъугъаны, кесини тирилиги да болушхандыла. Бюгюнлюкде уа  Эльмира  поликлиниканы жууаплы бёлюмлеринден бирине  башчылыкъ  этеди. Кюн сайын  ары  онла бла  адамла келедиле.  Аланы барысыны да тукъумларын, атларын да эсинде тутуп, кимни неси  къыйнагъанын да биледи хунерли къыз. 

– Саусузларыбызны асламысы  жыл санлары келген адамладыла, алай арт заманлада уа жаш адамла да кёп келип башлагъандыла. Баям, ол коронавирус бла байламлы болур, кёплени  жюреклери, къан басымлары къыйнайды, башлары  ауруйду. Барысына да къолубуздан келгенича болушлукъ этерге кюрешебиз, – дейди ол.

Саусузла уа барысы да Къалабекланы  къызны излегенлей, анга ышаннганлай турадыла.  Ол а хар бирине энчи эс бурады, къайгъырады. Анга   адамланы ышаныулары, жарыкъ кюлюулери, аны кёзюне ийнанып неда  ыспас этип къарагъанлары  неден да багъалыды.

– Бизни  ишибизде бек сейири – этгенинги магъанасын, хайырын хар кюнден кеси кёзюнг бла  кёргенингди. Тюнене ауруп, мыккыл болуп тургъан  ынначыкъ неда аппачыкъ, бюгюн кирпилдей башлагъан эсе, не мадар табаргъа билмей тургъан къызы, жашы, башха жууугъу санга ыразылыкъларын айта эселе, сен тамамлагъан иш да керек болгъанын ангылайса.  Бек башы уа – ишинги сюерге, аллынга  ышанып келгеннге, не амал да этип, болушургъа итинирге керексе. Уллу кёллюлюк этерге уа ахырысы  бла да жарамайды, – дейди Эльмира уа.

«Ол, мен врачма, медсестраны  ишин этерге керек тюйюлме деп, бир заманда да айтмайды. Керек болса, кеси капельницаны да салыр, укол да этер», – дейдиле аны юсюнден биргесине ишлегенле.

Дунияны башында бек багъалы эмда  сатып алалмазлыкъ – саулукъду. Таулу тиширыу келгенлеге аны дайым да эсгертгенлей  турады. «Бусагъатда ишлемесенг, жашар амал жокъду деп, кёпле саулукъларына уллу кёллю боладыла. Врачлагъа  келмейдиле. Ауруу тереннге кетгенден сора уа, жиляйдыла. Иш а  бошаллыкъ тюйюлдю. Жылгъа бир, къайда эки кере  поликлиникагъа келип,  толу диагностиканы ётерге кёп заман керек тюйюлдю», – дейди  врач.

– Манга бу поликлиниканы стационарына барырымы бир жууукъ   адамым юйретген эди. Бери келгениме  бир такъыйкъагъа да сокъуранмагъанма. Мында  Къалабекланы Эльмира Хакимовнаны башчылыгъында ишлерин тынгылы билген медсестрала  ишлейдиле.   Додуланы Танзиля, Насталаны Земфира, Шханукова Мадина саусузлагъа бек сакъдыла. Капельницала бошалгъандан сора да: «Ашыкъмагъыз, бир жарым сагъат окъуна жатып солугъуз», – деп къайгъырырла. Тазалыкъны, тизгинлиликни уа айтмай окъуна къояйым. Сау болсунла, барысына да жюрек ыразылыгъымы билдиреме»,–дейди  Темуккуланы  Светлана.

Мында кеслерине бакъдыргъан  башха тиширыула да  аны  айтханларына шагъатлыкъ этгендиле.

Холаланы Марзият.
Поделиться: