Ахлуланы эслеринде жарыкъ эмда огъурлу адамча къалгъанды

Кючменланы Таубий 1994 жылны 4 мартында Нальчикде туугъанды. 2011 жылда Хасанияны 16-чы номерли школун бошап, бийик билим алыргъа Белгородлу экономика эм право университетге киргенди, анда «юриспруденция» специальностьну сайлагъанды. 2013 жылда аскерге чакъырылгъанды, Екатеринбург шахаргъа тюшгенди. 2015 жылда уа Россейни Сауутланнган кючлеринде къуллукъ этерча, Прохладный шахарда келишимни тауусханды, сержант чында ишлеп башлагъанды.

Юч жылдан сора Таубийни Моздокга кёчюргендиле, анда ол расчётну башчысыны орунбасары болгъанды. Дондагъы Ростовда Хорламны Парадына талай кере къатышханды, аны ючюн майдал бла да саугъаланнганды. Былтыр таулу жаш 503-чю гвардиялы мотострелковый полкга кёчюрюлгенди, андан аны энчи аскер операциягъа къатышыргъа жибергендиле. Жарсыугъа, къарыулу, ахшы умутлары алыкъа алда болгъан уланны жашауу анда замансыз юзюлгенди. Кёргюзтген жигитлиги ючюн ол Кишиликни ордени бла саугъаланнганды (ёлгенден сора).

Таубий адамлада кертичиликни, огъурлулукъну, айтхан сёзюне ие болууну багъалагъанды. Юйюрюн бек сюйгенди, атасына бла анасына – Кючменланы Ибрагим бла Маржаннга, аммасы Ганифагъа татлы бала, эгечи Иринагъа ышаннгылы къарындаш болгъанды. Кёп болмай а кеси да Чочайланы Мариям бла юйюр къурагъанды, алагъа къызчыкъ да туугъанды.

Чамны сюе, даулашны, не тюрлю болумну да кюлкюге айландыра, жарсыгъанны кёлюн кётюре билген жаш эди Таубий. Юйдегиси Мариям айтханыча, ол чурумлагъа, къыйынлыкълагъа ышара тюбегенди. Жауун жауса, хар тюбеген адамны машинасына олтуруп, юйлерине жетдиргенди. Кесине тапсыз тюше эсе да, болушлукъ кереклиге аны этерге ашыкъгъанды. Жангы жерлени кёрюрге, кёбюрек билирге итиннгенди.  Аны бла бирге болгъан сейир тынч эди. Жууукъларыны, ахлуларыны эслеринде Таубийни жарыкъ, огъурлу, ышаргъан сыфаты къалгъанды.