«Кесинги аямай кюрешсенге жетишимлим боллукъса»

«Хасания» спорт клубда жаш, округ, къырал даражалада да хорлагъан гёжефлени жетишимли хазырлайдыла. Тренер Мисирланы Илияс да, сабийлени тутушууну энчиликлерине тюшюндюре, ала къарыулу болгъанларындан тышында, адамлыкъны да багъаларларына къайгъыра ишлейди. 

Спорт бла Мисир улу 10-11 жылында кюрешип башлагъанды, жараугъа къарындашлары чемпионла Бёзюланы Исмайыл эм Исхакъ бла жюрюп тебиреген эди. Жарауну ала «Спартакда» бардыргъандыла, биринчи тренери Чапайланы Алик болгъанды. Аз-аздан, бирде къытдыра, бирде хорлай, эришиулеге да къатыша башлагъанды. Хар сабийге биринчи уллу жетишими республикада биринчи жерни алсады, аны да биринчи уллу хорламы регион эришиуде «алтын» эди. Россейни спортдан устасы деген атны алыр ючюн, кёп тюрлю эришиуледе, ол санда Россейни биринчиликлеринде неда чемпионатында жетишимли болургъа керекди. Бирде «А» класслы халкъла аралы тунирде хорласанг да тамам болады. Ол битеуроссей турнирде къытханды, алай бла эркин тутушуу бла бир кесек заманны кюрешгенден сора, бел бауладан тутуп, тутушуугъа кёчгенди. Спортну бу тюрлюсюнден чемпионатда тутуша туруб а, кеси да билмей инбаш сюегин сындырады. Эришиуден сора, ачыгъанын да айтмагъанлай, республиканы жыйымдыкъ командасыны санында Сафин атлы «А» класслы халкъла аралы турнирде тутушады. Сюеги сынып тургъанлыкъгъа, талай тюбешиуюнде бир ненча такъыйкъаны ичинде хорлайды, алай финалгъа жетгенде хорлатады, къаршчы спортчугъа судьяла да болушхан эдиле. Инбашы кёбюп тура эди да, анга къолу бла тийгенлей ангылагъан эди сыннганын. Андан сора Россейни чемпионатында экинчи жерни алады, артда кесин тыш къыраллы эришиуледе да сынайды. Европаны бла дунияны ючюшер чемпионатларында (Киевде, Польшада, Юг Кореяда, Литвада, Латвияда) финалгъа чыкъгъанды, алада алтын не кюмюш майдалланы къытып тургъанды.

- «Хасания» клубда спортчуланы тёрт-беш тренер жыйылып юйретебиз, командабыз бирди, сабийлени сеники-меники деп юлешмейбиз. Жараугъа жюрюгенлени саны да 50-ге жетеди, аланы жыл санлары 8-15 жылды, гитче къауумда 5-6-жыллыкъла да бардыла. Алай, мени оюмума кёре, аллай гитчелени жюзюуге неда гимнастикагъа жюрютюп, тутушуугъа уа 8 жыллары толгъандан сора келтирселе игиди. Жарауну ыйыкъда беш кюнню бардырабыз, сабийлени приёмланы этдирип башларны аллында, чып тюшмезча, санларын къыздырырча разминка этдиребиз. Жылы кезиуледе тышында чапдырабыз, ойнатабыз. Жарау эки-юч сагъатны ётдюрюледи. Жыйылыулагъа Огъары Малкъаргъа, Минги тауну тийресине да барабыз, дейди Илияс.

Тутушуудан чып тюшгени бек терк тюбейди. Тренер чертгенича, спортну тынч тюрлюсю жокъду. Жетишимли болургъа сюйген инсан, кесин аямай кюреширге тийишлиди. Чып а къайда тюшерге боллукъду, ол къадарданды. Клубда сабийни жараугъа алырдан алгъа, саулугъу иги болгъанына справка излейдиле, залгъа жюрюгенле да жылгъа бек  азындан бир кере Спорт диспансерде битеу врачланы ётедиле.

Эришиулеге барыргъа болушлукъну спонсорла, ата-анала этедиле, тренерле кеслери да къошуладыла. Спортну айнытыугъа, гёжефлерибизге турнирлеге къатышыргъа онг тапдыргъан жашларыбызгъа жюрек ыразылыгъымы билдиреме, дейди Илияс. Клубну директору Гузойланы Ибрагим да спонсорланы табыугъа, спортну айнытыугъа уллу къыйын салады. Тюрлю-тюрлю эришиулени къурауда, ол санда Цийкъанланы Мухадин-хажини, Мечиланы Кязимни атлары бла бардырылгъан битеуроссей турнирлени ётдюрюуде аны кёп къыйыны барды. Малкъар халкъны жангырыу кюнюне аталгъан турнирни бийик даражада бардырылырына ол уллу къошумчулукъ этгенди. Биз да, аны биргесине ишлеген тренерле, анга миллети ючюн былай кюрешгенине ыспас этебиз, деп белгилейди ол.