Аз тёлер амалны болжалы тауусула турады

Келир жыл биринчи январьдан сора «Госуслуги» интернет-порталгъа кирип, къырал пошлинаны 30 процентге учуз тёлерге амал боллукъ тюйюлдю. Аны юсюнден РФ-ни Финансла министерствосунда айтхандыла. Аллай оноу нек этилгенин ангылата, бу амал аллындан окъуна болжал халда кийирилгенин эсге салгъандыла.

Къырал жумушланы багъаларын отуз процентге учуз тёлеуню амалы 2017 жылда чыкъгъан эди. Кесин да эки жылдан сора тыяргъа сюе эдиле, алай шёндюге дери къойгъандыла. Ол хайырлы болгъанын а кесигиз тергегиз. Сёз ючюн, таматалагъа тыш къыраллы паспортну жарашдырыу беш минг сом турады, бу амал бла уа, жаланда 3500 сом берирге болады. Алай этер ючюн заявление жазаргъа, тийишли жерлеге билдирирге да керекмейди: жумушну «Госуслуги» порталда тамамлагъанда, аны багъасы кеси аллына азаяды.

Андан сора да, бу сайтда жоллада жюрюуню жорукъларына этилген бузукълукъ ючюн тазирни жаланда 50 процентин тёлеп къутулургъа болады. Аллай онг къуру «Госуслуги» порталны хайырланыучулагъа угъай, ол тазирни жыйырма кюнню ичинде жабаргъа сюйгенлеге да бериледи. Аны болжалыны юсюнден а хапар жокъду, башхача айтханда, КоАП-ны 32.2 статьясына тийишлиликде ол дайым ишлерик жорукъду.

 

Улбашланы Мурат.
Поделиться: