Налогла тёлеуню юсюнден энтта да бир кере

Акъылбалыкъ болмагъанны иелигинде тургъан жер участка ючюн налог келирге керекмиди; транспорт налогну инспекциягъа бармай тёлерге боллукъмуду; мобилизациягъа тюшген аскерчиге фатар ючюн налог тёлегенде льгота берилемиди; «энчи кабинети» болгъан инсаннга билдириу къагъытда жиберилемиди; кадастр багъасы, налог ставкасы да тюрленмей тургъанлай гараж ючюн налог нек кётюрюлгенди, - алагъа эмда быйыл ведомствогъа жиберилген башха соруулагъа жууапланы ФНС-ни интернет-сайтында (https://www.nalog.gov.ru/rn77/service/kb/) басмалагъандыла. 

Алай бла, акъылбалыкъ болмагъан инсанны иелигинде участкасы, фатары, жеринден тепдирилмеген башха мюлкю бар эсе – ол налог тёлеучюлени санына киреди. Ала ючюн ахчаны ата-аналары, закон бла белгиленнген (алагъа кёз-къулакъ болгъан) адамлары неда башхала берирге керекдиле.

Налогну тёлерча инспекциягъа бармаса да боллукъду; аны билдириуню юсюнде басмаланнган QR-код бла кёчюрюрге амал барды. Бу жумушну банкда, жер-жерли администрациялада кассалада, почтада неда МФЦ-да тамамларгъа да болады.

Аскерчилеге уа, ол санда мобилизациягъа тюшгенлеге да, мюлк налогну юсю бла жаланда бир объект ючюн льгота бериледи. Кеси да ол мекям предпринимательство ишде хайырланылмай эсе. Ол а быллай объектледен бири болургъа тийишлиди: фатар неда отоу, юй, Налог кодексни 407 статьясыны 1-чи кесегинде 14 эм 15 номерли бёлюмлеринде тизмелеге тюшген мекямланы тюрлюлери, гараж неда машина салыргъа жараулу бир орун.

Льгота аскер къуллукъ этиу кезиуге бериледи, кеси да заявлениягъа тийишлиликде. Аны уа налог органнга къачан эмда къалай сюйсегиз да жиберирге (МФЦ, почта, «Энчи кабинет»…) эркинсиз.

Къагъытда басмаланнган билдириуню юсюнден айтханда уа, аны, ФНС-да «Энчи кабинети» болгъан хайырланыучу, налог органны бёлюмюнде неда МФЦ-да алыргъа боллукъду. Заявление берилсе, билдириуню беш кюнню ичинде хазырлап,къолуна тутдурлукъдула.