Жаш тёлю къымылдауну ишини программасы жарашдырыла турады.

КъМР-ни Башчысы Казбек Коков Сабийлени бла жаш тёлюню битеуроссей жамауат-къырал къымылдауу бла Бирге ишлеу жаны бла республикалы координация советни биринчи жыйылыуун бардыргъанды. Аны ишине школ активистле бла аланы насийхатчылары къатышхандыла.

Советни борчу -властьны федерал органлары бла, федерал координация совет эмда Сабийлени бла жаш тёлюню Россейли къымылдаууну офиси бла  бирге ишлеуню къыйматлы къурауду.

Эсигизге салайыкъ, Президентибиз Владимир Путин Сабийлени бла жаш тёлюню битеуроссей жамауат-къырал къымылдауун къурауну юсюнден законнга къол салгъанды, аны къараучу къауумуна да кеси башчылыкъ этгенди. Къырал башчыны оноуун эмда андан сора берилген буйрукъларын толтурур муратда  къыралда  жангы къымылдауну кадрла, методика эмда инфраструктура жаны бла ишин къурау  барады, регион, жер-жерли эмда биринчи бёлюмле ачыладыла. Бюгюнлюкде жангы къымылдауну эсепге тюшюрюу жаны бла иш тамамлана турады, битеуроссей съезд бардырыргъа белгиленеди. Анга уа Къабарты-Малкъарны келечилери да къатышмай къаллыкъ тюйюлдюле.

Бизни республикада россейли жаш тёлюню къымылдаууну регион бёлюмюн къурау жаны бла жамауат штаб ишин бардырады. Жамауат биригиулени келечилерини, жаш активистлени, насийхатчыланы къатышыулары бла къурау жумушла толтурулгъандыла. Жаш адамланы араларында бардырылгъан социал тинтиулени эсеплерине кёре жаш тёлю къымылдауну ишини программасы жарашдырыла турады.

Жангы къымылдау сабий эмда жаш тёлю биригиулени тёрелерин къайтарыргъа, алагъа  ишлерин заманны излемлерине кёре къураргъа болушурукъду. Республикада 38 жаш тёлю биригиу бла НКО бардыла. Аладан эм уллулары быладыла: «ЮНАРМИЯ» битеуроссей аскер-патриот жамауат къымылдауну эмда «Школчуланы россейли къымылдауу» битеуроссей жамауат-къырал сабий-жаш тёлю биригиуню регион бёлюмлери.

КъМР-де Волонтёрлукъну айнытыуну ресурс арасы да эм кючлю жаш тёлю биригиуледен бириди. Аны бёлюмлери битеу муниципал районлада бла шахар округлада ачылгъандыла. Жыл сайын волонтёрлукъ ишге республикада тюрлю-тюрлю жыл санда 40 минг чакълы адам къатышады. Бу ишни башламчысы уа жаш тёлюдю. Россейли жаш тёлюню къымылдаууну регион бёлюмю бизде болгъан жаш тёлю кючню бирикдирликди, бу институтну мындан ары айныууну тюз жолун кёргюзтюрюкдю.

Жыйылыуну кезиуюнде жаш тёлю инфраструктураны андан ары айнытыуну амаллары, шёндюгю заманнга бютюн магъаналы болгъан ишлери да сюзюлгендиле. Кёпле бизни  Ата журтубузну къоруулагъан аскерчилерибизге бла аланы юйюрлерине болушлукъ этер жанлы болуп сёлешгендиле.  Къымылдаугъа  республиканы хар элинде бла шахарында элли жаш тёлюню бла школчуланы къошаргъа керекди, деген оюмла да эшитилгендиле.  Россейли жаш тёлюню къымылдаууну регион бёлюмюню ишин бардыргъанда битеу айтылгъан оюмла эсге алынырыкъдыла.