«Маданиятыбызны юйлерибизге къайта тургъаны мени къууандырады»

Къулийланы Марина битеу миллет байрамлада кёрмючлеге къатышады. Аны гинжилери, жыйрыкълары, накъыш салыннган ишлери къараучуланы сейирсиндиредиле.

«Маданиятны дуниясы бла байламлы боллукъду ишим деп эсимде да жокъ эди, - дейди ол. - Алай бир жол, жыйрыкъ тикгенимден сора къалгъан къумач журунланы атаргъа кёзюм къыймай, гинжи этеме. Тюкен гинжи сатып алама да, аны башына халыла суууруп, чач эшмелеге ушатама. Сора ёсюмюне кёре миллет ышанлары бла кийимле тигеме. Баш ием ол гинжини ишине, жёнгерлерине кёргюзтюрге элтеди. Аладан бири уа аны сатып алады. Ол кюн къууанабыз, къол усталыкъгъа адамланы аллай бир сейирлери болгъанын билмей эдик. Андан сора башланнганды мени маданият жашауум».

Аны бир гинжиси башхасына ушамайды, хар адамны кесини энчи сыфаты болгъанча, аланы да бетлери, кийимлери да башхаладыла. Къапталчыкъларына кюбюрледен къумачланы хайырланады. Ынналарыбызны кюбюрлери, къумачлары, жаулукълары юйлерибизде сыйлы жерде турургъа керекдиле, дейди.

Алгъаракъда уа бир жыйрыкъны эки ай тикгенди. Накъышлары бла ариу миллет кийим болгъанды. Аны Къулий Къайсын атлы музейде кёрюрге боллукъду. «Аны бла чекленмей, башлыкъ этерге да юйреннгенме, интернетде дерслеге къарап. Сау болсунла, кёп устала билимлерин халкъгъа жаядыла», - деп къошханды уста къоллу тиширыу.

- Таулу халкъны байрамларында усталаны ишлерине къарасам, тёппем кёкге жетеди. Бек ёхтемленеме. Алай маданиятда биринчи атлам этген бек къыйынды, кесинге базыналмайса, арсарлы боласа. Аллай кезиуюмде манга, жаннетли болсун, анамы эгечи Болатланы Людмила болушхан эди. Ол накъышланы юслеринден кёп зат айтханды, хар миллетни оюулары башха болгъанларын кёргюзтген эди. Жаннетли болсун, менде къыйыны уллуду. Болатланы Людмиланы кийизлери музейледе, энчи коллекциялада сакъланадыла, ол бийик художестволу билими болгъан биринчи таулу тиширыу эди. Ызындан келгенлеге къайгъырыуу, алагъа эс бурууу, юйретиую аны не адам болгъанын ачыкълагъан шартды, - дейди Марина.

Ол таулу накъышланы суратлача да ишлейди, аланы адамла юйлеринде тагъадыла. «Миллет маданиятыбыз юйлерибизге къайта турады, ол мени жюрегими къууанчдан толтурады», - дейди.