Тюйюшню тохтатыр ючюн жашауун бергенди

Быйыл 3 апрельде кюндюз 33-жыллыкъ нальчикчи машинасында Мальбахов орамда бара болгъанды. Алай бир кесиуде башха машинаны водители, жорукълагъа бузукълукъ этип, аны  чырмагъанды. Анга тёзмей, водительлени арасында даулаш башланнганды.

Иш аны бла тохтамагъанды. Нальчикчи «дерс» берир мурат бла башха водительни ызындан къуууп, арбазладан биринде жетгенди. Алайда тюйюш башланнганды, аны кезиуюнде ишекли машинасындан бичакъны чыгъарып, экинчини аны бла къоркъутханды. 

Битеу бу ишни 79-жыллыкъ тиширыу кёрюп тургъанды. Ол полициягъа сёлешгенин билдирип, бузукъчуну тохтаргъа чакъыргъанды. Жууапдан къачар мурат бла терсленнген, машинасына олтуруп, алайдан къачып тебирегенди. Алай тиширыу аны тохтатыргъа умут этип, капот аллына сюелгенди. Анга да къарамай, тиширыугъа заран салынырыгъын ангылап, жаш адам машинасын тебиретгенди. Ол тиширыуну юсю бла ётюп, алайдан букъгъанды. Алгъан жаралары асыры ауурдан ол жеринде ауушханды.

РФ-ни Следствие комитетини КъМР-де следствие управлениясыны къуллукъчулары нальчикчиге РФ-ни УК-сыны 213-чю статьясыны 2-чи кесегине эм 105-чи статьясыны 1-чи кесегине кёре терслеу материалла ачхандыла. Ол башханы сауут неда анга ушаш зат бла къоркъутуп, зорлукъ сынатыргъа умут этгени эмда мурдарлыкъ ючюн жууапха тартыллыкъды. Бу иш сюдню къараууна берилгенди.