Сабийлени къоркъуусузлукъларын жалчытыу – магъаналы жумуш

«Единая Россия» политика партия сабийлени къоркъуусузлукъларыны федерал стратегиясына предложенияла кёргюзтгенди. Ол партияны халкъ программасыны магъаналы бёлюмюдю.

 Сабийлени къоркъуусузлукъларыны стратегиясы ёсюп келген тёлюню жашауун, саулугъун сакълауну, тынчлыкълы жашауун къурауну амалы болургъа, бу жаны бла эм иги сынауланы жыйышдырыргъа, къоркъуулу болумланы ачыкълап, аланы алгъадан да тохтатыргъа тийишлиди. Аны юсюнден партияны аналыкъны, сабийликни  къоруулау эм юйюрге себеплик жаны бла комиссиясыны башчысы, партияны генеральный советини секретарыны орунбасары Анна Кузнецова айтханды. 

 - Сабийлени ачытыу, зорлукъ сынатыу аманлыкъла кёбейип барадыла. Следствие комитетни шартларына кёре, былтыр ёсюп келген тёлюге этилген аманлыкъла, аны аллында жыл бла тенглешдиргенде, 16,9 процентге ёсгендиле. Битеу  да бирге  22 мингден аслам уголовный иш ачылгъанды.  Аны бла бирге, жыл санларына кёре, уголовный жууапха тартылыргъа жарамагъан къауумланы арасында аманлыкъчылыкъла да ёсгендиле.

МЧС билдиргенича, былтыр тенгизледе бла черекледе 267 сабий батханды. Жоллада авариялада уа 554 бала ёлгенди, ол да 2020 жылдан  асламды. Энтта бир жарсыулу шарт. Кеслерин ёлтюрюу кезиуле да уллулай къаладыла. Былтыр - 753 кезиу. Ол а 2020 жылны кёрюмдюлеринден 37,4 процентге кёпдю. Былтырны биринчи  жарымында терезеледен жыгъылып ачыгъанла эм ауушханла да бардыла: 640 кезиуден хар онбиринчиси ёлюм бла бошалгъанды.

Кёресиз, сабийлени жашауларына, саулукъларына къоркъуула кёпдюле. Алагъа уа социальный сетьледе къужур ишлени, школлада аланы тенглери хыликкя этгенлерин, зорлукъ сынатханларын да къошаргъа боллукъду. Сёзге, 2021 жылны жаланда ючюнчю кварталында  акъылбалыкъ болмагъанланы кёрюп болмау, хыликкя этиу кезиуле 2020 жылны ичинде тохташдырылгъан кезиуледен 43 процентге кёбейгенди,-деген жарсыулу шартланы билдиргенди Анна Кузнецова.

Аны айтханына кёре, жууаплы органла профилактика мадарлагъа энчи эс бурадыла. Алай сабийлени къоруулаугъа жууаплы энчи ведомство болмагъаны бу ишни хайырлы бардырыргъа чырмагъанын да белгилегенди ол.

Документ энтта хазырланады. Анга тюрлю-тюрлю ведомстволадан предложенияла келедиле. Ол санда сабийлени къурулушлагъа, адам да жашамагъан, оюла тургъан мекямлагъа жууукъ къояргъа жарамагъаныны, сууда къоркъуусузлукъну, интернетде бузукъчу къауумланы ишлерин тохтатыуну юслеринден эм башхала. 

  КъМР-ни Парламентини Урунуу, социал политика  эм саулукъ сакълау комитетини башчысы, «Единая Россияны» КъМР-де бёлюмюню  политсоветини келечиси Хусейн Кажаров стратегияны къурауну юсюнден кесини оюмун билдиргенди. Ол   kabardin-balkar.er.ru сайтха   докумнет артыкъда магъаналы болгъанын айтханды:

- Сабийле бизни келир  кюнюбюздюле. Ол а жарыкъ эм насыплы болур ючюн бюгюнден башлап ишлерге керекди. Сабийлени къоркъуусузлукъларыны стратегиясы партияны халкъ программасында белгиленнген башха жумушла бла бирге кесини хайырлылыгъын кёргюзтюрюгюне ишексизме,-дегенди ол.