Юйюр къурау ну къайгъыларын кёре

Бизни республикада жангыз адамла бек кёпдюле. Аны бла бирге танышыргъа амалла уа аздыла. Аллайлагъа болушлукъгъа деп Нальчикде юйюр къураргъа сюйгенлеге  «Шанс» агентство ишлейди. Бери бизни республикада жашагъан миллетлени келечилери келедиле: биреу бла танышып, заманны оздурургъа угъай, керти жашау нёгер табып, юйдегили болургъа. Биз агентствону таматасы Лариса Маремкуловагъа бир талай соруу  бергенбиз.

- Быллай агентство ачаргъа къайдан эсигизге келгенди?

- Шёндюгю дунияда жашланы, къызланы танышыргъа, жылла бла шуёхлукъ жюрютюрге заманлары жокъду. Бирле окъуйдула, башхала ишлейдиле, къадарларыны юсюнден тынгылы сагъыш этерге эслерине келмейди. Заман а алай терк озуп кетеди, къарап-къарагъынчы   къартлыкъ жетеди. Бу ишни къурай туруп, адамлагъа болушургъа сюе эдим.

Мени акъылыма кёре, жангы затны мурдору таза ниет, игиликге итиниу болургъа керекди. Ким келликди миллет республикада агентствогъа жашау нёгер излей,  дегенле да  болгъандыла. Алай мени сынауум кёргюзтгенди: керек эди бу иш, келгендиле адамла.

Алгъын тукъум башчыла оноу этгендиле, элде хар инсаннга къайгъыргъанла чыкъгъандыла. Тойла ыйыкъла бла барып, алагъа жаш адамла жууукъ элледен жыйылып, бир бирни кёргендиле. Бусагъатда уа бир элни ичинде окъуна бир бирлерин танымагъанла кёпдюле.

Эрттегили тёреле  ишлемей эселе, юйюр къураргъа  себеплик этерик жангы амалла бла хайырланыргъа керекди. Озгъан жылда эки жюз адам келгенди агентствогъа.  Жыл санларыны юсюнден айтсакъ, жыйырмаэкижыллыкъладан башлап жетмишючжыллыкъла да бардыла.

- Тойла уа болгъанмыдыла?

- Хау, жыл сайын бир талай тоюбуз болады.

- Келгенле не зат излегенлерин айтамыдыла? Баям, эм алгъа ариулукъну сагъына болурла?

- Угъай, ариулукъну биринчи жерге салмайдыла. Халал, сабыр, этимли болсун дейдиле да, эм артда уа ариу болса да игиди, деп къошадыла.

- Къызла назик болур ючюн, кеслерин бек къыйнайдыла…

- Назиклени уа сюймейдиле. Ачыкъ айтханда, арыкъсуу адамла кёзге ариу кёрюнмейдиле.

-Тютюн ичген къызлагъа кёз къарам а къалайды?

-Осалды. Анкетаны толтургъан хар эр киши «тютюн ичмегенни излейме» деп жазады. Аны бла бирге кёпле сабийи болгъан тиширыу бла да танышыргъа хазырдыла.

-Адамланы  къалай танышдыргъаныгъызны айтчыгъыз?

-Хар келгеннге къарагъан кезиуюмде окъуна ол кимге бюсюрерге боллугъун билеме. Суратла кёргюзтмейме, ойлай кетеме да,  биреуню сайласам, экисин да чакъырама да, танышдырама. Сора ала бирге паркга кетедиле, ушакъ бардырадыла.

Экинчи кюн къызгъа неда жашха: «Телефон номерлеригизни алгъанмысыз бир бирден?»-деп сорама. Алгъан эселе, иш тепгенди жеринден, алмагъан эселе уа, бир бирге бюсюремегендиле.

-Таулула уа бармыдыла клиентлеригизни араларында?

-Хау, бардыла.Билемисиз, башлагъан заманымда мен муну бир бош иш суна эдим. Хар келген мени агентствомда насыбын табарыгъына ийнанып тургъанма. Айхай, болмады мен умут этгенча. Жашау бир-бирлени жюреклерин къатдырып къояды, жокъду анда жер башха адамгъа.

Шёндюгю тёлю тёзюмсюздю, хар зат да жомакъдача къуралып къалса сюеди. Бизни аппаларыбыз-ынналарыбыз юйюр къалаларын кюнден-кюннге, жылдан-жылгъа ишлегендиле, ангылай эдиле ала бир кюннге юй-кюн болмазлыкъларын.

Таш юсюнде юйле болгъанланы туудукълары бюгюннгю мамыр жашауда абызырап турадыла. Юйюр къурар ючюн, кеси кесине ийнаныу, базыныу, эм алгъа уа бизни жаратханнга къадарынгы ышаныу керекди. Ол заманда хар юй да сабий ауазладан толлукъду.