Эл мюлк

Мал аш жарашдырыу

Быйыл  республикада мюлклени барында да къыш кезиуде 310 минг чакълы мал кечинирикди. КъМР-ни Эл мюлк министерствосу  муниципалитетлени барында да информацияны тийишдирип  ол кёрюмдюню алай тергегенди. Санайда  юй къанатлыланы бла тонгузланы санын эсге алмагъандыла. Озгъан жыл бла тенглешдиргенде, бу кёрюмдю бир процентге кёбейгенди.

Ол кезиуде изленирик мал ашланы хазырлау да къытауду. Бу кюнлеге мюлкле 450 минг тонна бичен этгендиле, салам эмда сенаж хазырлагъандыла. Алай  бла излемлерин кёп къалмай толусунлай жабадыла. Силосдан эмда башха мал ашладан а эки процентге артыгъы бла окъуна къыстырыкъ этилгенди. Иш аны бла тохтамагъанды, энтта да барады, дегендиле  тийишли министерствода.

 

Мюлкледе  жангы техника

Эл мюлкде уруннганла мюлклерин тийишли техника бла жалчытыуну къайгъысын дайым этедиле. Быйыл ал сегиз айны ичинде республикада аграрчыла  битеуда 70 жангы трактор къоллу болгъандыла. Тенглешдирип айтханда, ол былтыргъы кёрюмдюден асламды, дегендиле КъМР-ни Эл мюлк министерствосунда.

Техниканы асламы (55) Минскде тракторла чыгъарыучу заводдан келгенди.  бешисин да Петербургну трактор заводундан алгъандыла. Къалгъан онусу уа тыш къыраллада чыгъарылгъан техникады.

Мюлкле дагъыда алты комбайн сатып алгъандыла. Ол санда экиси мирзеу эмда бири  нартюх жыйыучу, бири уа мал аш жарашдырыучу.

 

Омарланы Мурат хазырлагъанды.
Поделиться: