Эл мюлк производство айныйды

Шимал-Кавказстатны билдириуюне кёре, Къабарты-Малкъарда быйыл ал сегиз айны ичинде эл мюлк производство 3,7 процентге кёбейгенди, былтырны бу кезиую бла тенглешдиргенде. Алай  бла ол29,6 миллиард сомгъа жетгенди, деп белгилегендиле республиканы Эл мюлк министерствосунда.

Битимчилик бёлюмде тирлик жыйыу  бошалмагъанды. Тергеулеге кёре ол да былтыргъы кёрюмдюледен эсе игиди. Малчылыкъны юсюнден айтханда, быйыл январьдан башлап августха дери 4,3 процентге аслам эт чыгъарылгъанды, 3,1 процентге кёбюрек сют сауулгъанды эмда 2,6 процентге кёп жумуртха жыйылгъанды. Эсепле  озгъан жылны бу кезиуге кёрюмдюлери бла тенглешдирип  чыгъарылгъандыла.

Малланы саны да 1,1 процентге кёбейгенди, дейдиле ведомствода. Быйыл биринчи сентябрьге мюлклени барында да 273,2 минг мал бар эди. Ол санда 137,5 минг ийнек. Къойладан бла эчкиледен а 422,4 минги эсепге тюшгенди.