Сабийле заманларын зауукълу ётдюргендиле

Роспотребнадзорну Къабарты-Малкъарда бёлюмюнден билдиргенлерине кёре, быйыл жай кезиуде сабийлеге 42 саулукъландырыу учреждение ишлегенди. Алада 9850 сабий солугъанды. Ол санда шахарладан тышында орналгъан оналты учрежденияда 7500 сабий кечиннгенди. Билим бериу организацияланы мурдорунда къуралгъан, кеслери да жаланда кюндюз ишлеген 26 учрежденияда уа минг бла жарымы болгъанды. Дагъыда Кърымда тенгиз жагъасында 84 сабий солуп келгенди. Ала бары да къолайсыз юйюрледен эдиле.

Республиканы Тарифле эмда жашау журтлагъа надзор этиу жаны бла къырал комитети шахарладан тышында орналгъан быллай учреждениялада бир жерни кюнлюк багъасын 965 сомда тохташдыргъанды. Тау этеклеринде учреждениялада уа ол 1266 сом эди. Сабий саулукъландырыу лагерьледе ашны бир кюнлюк багъасыны орта ёлчеми да 310 сомгъа жетгенди.

Ашны юсюнден айтханда, стационар учреждениялада эмда санаторийледе сабийлеге аны кюннге беш кере бергендиле. Ол санда кёгетле, жемишле да къошуп.

КъМР-ни Гигиена эмда эпидемиология арасыны специалистлери быллай жерледе таза сууну юлгюлерин  алып, аланы санитар-химия, микробиология, паразитле жаны бла тинтгендиле. Бары да белгиленнген излемлеге келишгенин тохташдыргъандыла.

Сабийлени быллай учреждениялада кечиндиргенде, алагъа медицина болушлукъ бериуню къайгъысын да этгендиле, бирлеринде тийишли жерле да къурагъандыла. Ишчилени уа гигиена жаны бла юйретип, сагъынылгъан арада эмда аны бёлюмлеринде аттестация бардыргъандыла.

Кеси жанындан прокуратура да сакъ болгъанды: аны келечилери, Роспотребнадзорну адамлары бла бирге бир ненча тинтиу бардыргъандыла быллай учреждениялада. Алагъа кёре 191 минг сом багъасына онжети тазир салыннганды эмда санитария законодательствогъа бузукълукъ этилгени ючюн юч эсгертиу этилгенди.

Ведомствода айтханларына кёре, жайда быллай учреждениялада болгъан сабийлени кёп къалмай барына да ол кезиу саулукъларына бек хайырлы болгъанды.