Суу бойнунда жаяу жолла, кёпюрле, сабий майданла

Быйылгъы  жыл  Къабарты - Малкъарны тарыхында бек уллу тюрлениулени жылыча къаллыкъды. Республиканы жюзжыллыгъына аталып бардырылгъан ишлени араларында энчи жерни паркны айбатландырыу алады.  «100- жыллыкъны суу боюну»  деген проектге кёре  анда юч жыяу жол тапланнганды: «Бирликни жолу» - ол Осетинская орамдан башланып, Кешоковагъа жетеди, «Мамырлыкъны жолу»  Идаровадан орамдан Осетинскаягъа  барады, «Келишиулюкню жолу» уа Кешоковада башланып  Канукоевада бошалады.

Бу жоллада велосипед бла учаргъа боллукъду. Ууакъ сабийлеге деп, майданчыкъла ишленнгендиле. Олтурургъа шинтикле бир бирлерине жууукъ салыннгандыла: къыйналып жюрюген уллайгъан адамла да солуй – солуй паркда айланаллыкъдыла. Андан сора да,  минерал суу бла кранчыкъла орнатылгъандыла. Дагъыда бир къууанчлы иш: эки жангы кёпюр ишленнгенди. Алгъын кёпюрню чириген къангаларыны орунуна адамла,  тапхан затларын салып, жамаргъа кюрешип тургъандыла. Энди уа бир кёпюр акъ пластикденди, экинчиси уа темирденди. Ала кёп жылланы адамлагъа къуллукъ этип турлукълары баямды.

Паркда жаяу жолла шахарны районларын бирлешдиргендиле, энди  гитче шахарчыгъыбызда бир бирге къонакъгъа паркда жыяу жолла бла да барыргъа онг чыкъгъанды. Андан сора да,  курорт тийреден Нальчикни арасына  туристле жаяу келаллыкъдыла.

Паркгъа быллай уллу эс бурулгъаны бек къууандырады, нек дегенде ол битеу да республиканы ёхтемлигиди. Аны жангыртыр ючюн битеу да Совет Союздан специалистле келип ишлегендиле, аланы къол ызлары, оюмлары энтта да сезилгенлей турады. Жарсыугъа, арт жыллада анда кафеле, ресторанла ишлегендиле, ариу хауаны орунун аш ийисле алгъандыла. Кёп шахарлада парклада бир зат да сатылмайды, аш объектле да ишленмейдиле, сёз ючюн, Калининградда.

Жаяу жолчукъланы бир къыйыры тюзюнлей Хасанияда жюн базаргъа келтиреди. Энди аны да шёндюгю дунияда мардалагъа келтирселе,  бир федерал программагъа кирип, бек аламат боллукъ эди, нек дегенде,  бизни республикагъа келген туристле бери  къайтмай къалмайдыла. Битеуда 2022 жылда къырал программалагъа кёре онжети инвестпроект жашауда бардырыла турады, алагъа кёре сегиз жюз жангы ишчи жерле ачыллыкъдыла, жюз бла онжети социал  объект хазыр боллукъду, тынгылы ремонт эм реконструкция жюз бла жетмиш эки объектге этилликди, бир минг адам а  тозурагъан  юйледен жангы жашау журтлагъа кёчерикдиле.

Байсыланы Марзият.
Поделиться: