Казбек Коков къурулуш ишле бла байламлы штабны жыйылыуун бардыргъанды

КъМР-ни Башчысы Казбек Коков капитал къурулуш ишле бла байламлы ыйыкъ сайын бардырылыучу штабны жыйылыуун бардыргъанды. Анда республиканы уллу объектлеринде ишле къалай бардырылгъанларын сюзгендиле, миллет проектле, федерал эм регионал программала эм жашау- журт коммунал мюлк инфраструктураны къышха хазырлыгъыны юсюнден соруулагъа къарагъандыла.

Жыйылыугъа КъМР-ни Правительствосуну Председатели Мусукланы Алий, аны биринчи орунбасары Муаед Кунижев, КъМР-ни къурулуш эм жашау- журт коммунал мюлк министри Алим Бербеков, КъМР-ни траспорт эм жол мюлк министри Аслан Дышеков, КъМР-ни саулукъ сакълау министри Рустам Калибатов, КъМР-ни жарыкъландырыу эм илму министри Анзор Езаов, КъМР-ни маданият министри Мухадин Кумахов, КъМР-ни спорт министри Ислам Хасанов къатышхандыла.

 Алим Бербековну билдиргенине кёре, быйылгъы жылда миллет проектлени эм къырал программаланы чеклеринде 123 жерде 7,2 миллиард сом багъасы къурулуш ишле бардырыладыла. Къурулуш министрни айтханына кёре, бюгюнлюкге сегиз тынгылы объект хайырланыргъа берилгенди. Бахсанны алтынчы эм онунчу школларында алтмыш жерлери болгъан мектепге жюрюгюнчю дери сабийлеге къарагъан къошакъ бёлюмле, Ташлы-Талада бла Жангы Малкъарда алтмыш жерлери болгъан ясли блокла ачылгъандыла, Вольный аулну «Нарт» микрорайонунда  140 жери болгъан сабий сад ишленнгенди. Андан сора да Аушигерде бир кезиуге 90 адамны алырча амбулатория ачылгъанды, Солдатское эм Пролетарское станицалада   суу чыгъаргъан жангы скважинала ишленнгендиле.

Жыйылыуда жылны аягъына дери капитал къурулушда 10 объект хайырланыргъа бериллиги айтылгъанды. Ала Нарткъалада, Кубада эм Прохладныйде битеу да 1785 жери болгъан мектепле боллукъдула.

Солдатское станицада 140 сабий сыйыннган садны къурулушу бошала турады. Шёндю мекямны башын къанжал бла жаба турадыла, ичинде сюртюу-бояу ишле этиледиле эм къурулушну мекямларыны тёгереклери тапландырыладыла. Битеу ишле белгиленнген болжал бла бардырыладыла, - дегенди Алим Бербеков.

Жылны аягъына Дыгулыбгейде поликлиникада жангыртыу ишле бошалыргъа керекдиле эм Акъ-Сууда «Экрин ёзен» районда жашау журтла ишлеген жерде суу эм канализация баргъан быргъыланы салып бошарыкъдыла. Дыгулыбгейде канализация коллектор эм Заюково бла Жангы-Хамидие элледе от тюшгеннге къажау жангы депола  ишленирикдиле. Шёндю Бахсанны группалы суу баргъан ызын ишлеу бла байламлы къошакъ халда келишим этиле турады. Анга кёре Сармаково бла Кёнделенде суу баргъан быргъыланы жангыртыргъа айтылады.

Саулукъ сакълауну объектлеринде уллу жангыртыу ишле бардырыладыла. Республикалы сабий клиникалы кёп профили болгъан араны эки багъыу блогунда къурулуш ишле бошала турадыла, шёндю сюртюу-бояу ишле этиледиле.

 Эсигизе салайыкъ, Республикалы сабий клиникалы кёп профили болгъан арагъа тынгылы ремонт этерге РФ-ни къыстырыкъ фондундан Правительствону Председатели Михаил Мишустинни себеплиги бла 125 миллион сом бёлюннген эди. Андан сора республикалы бюджетден  алгъыннгы Перинатал араны экинчи корпусун тынгылы ремонт этерге 73 миллион сом бёлюннген эди. «Шёндю анда къурулуш ишле къыстау бардырыла турадыла, ала белгиленнген болжалда бошаллыкъдыла»,-дегенди саулукъ сакълау министр Рустам Калибатов.

Ол дагъыда саулукъ сакълауну биринчи звеносунда жангыртыу ишле къалай бардырылгъанларыны юсюнден шёндюге болгъан билдириуню этгенди.

 Вольный аулну поликлиникасыны баш этажларында ремонтла бошалгъандыла, энди тюп этажларына кёчедиле.  Экинчи поликлиниканы филиалында лифтни алышындыргъандыла, рентген кабинетге ремонт этилгенди. Нальчикни ючюнчю поликлиникасында ремонт ишле бардырыллыкъдыла. Андан сора да Зольск  эм Черек районланы поликлиника бёлюмлеринде жангыртыу ишле бошала турадыла.  

Транспорт министр Аслан Дышековну айтханына кёре, быйыл ноябрь айны алына Чегем районда автомобиль жолгъа бла беш кёпюрге, Огъары Курпха баргъан жолгъа ремонт этилип бошаллыкъды. 2023 жылгъа этилген  планлагъа кёре, жол къурулуш ишлеге 4,4 миллиард сом бёлюнюрюкдю. «Къоркъуусузлу качестволу жолла» миллет проектни чеклеринде тынгылы халгъа 70 километр жол келтирилликди, 261 метр автомобиль кёпюрге эм темир жол ётген жерлеге ремонт этилликдиле, 30 километр регион жолда чыракъла жанарча боллукъдула. Андан сора да «Регион эм жер-жерли магъанасы болгъан автомобиль жолланы айнытыу» федерал программаны чеклеринде  23,8 километр автомобиль жол тохташдырылгъан мардагъа келтирилликди.

Дагъыда «Эл жерлени тынгылы айнытыу» къырал программагъа кёре, алты элде 18,6 километрге ремонт этилликди. Андан сора да гитче шахарланы орамларында жангыртыу ишле бардырыллыкъдыла.

Жыйылыуда кюз эм къыш кезиулеге хазырланыу бла байламлы соруулагъа энчи эс бурулгъанды. Республиканы жашау журт фонду толусунлай къыш кезиуде хайырланырча хазырлыкъ паспортланы алгъандыла. Андан сора да кюз-къыш кезиуде авария-диспетчер службала халкъны коммунал жумушла бла толусунлай жалчытырча сау кюнню ишлеп турурча белгиленнгенди, деп билдиреди КъМР-ни Башчысыны эм Правительствосуну пресс-службасы.