Саулукъ сакълаугъа, билим бериуге аслам эс

Россей Федерацияны келир жылгъа эмда 2024-2025 жыллагъа бюджетни проекти Къырал Думагъа сюзюуге 28 сентябрьде берилгенди. Анда къайсы бёлюмлеге асламыракъ эс бурургъа кереклисини юсюнден «Единая Россия» партияны депутатлары Дмитрий Хубезовну эм Ольга Казакованы эшитдирген оюмларын партияны Къабарты-Малкъарда бёлюмюню пресс-службасындан билдиргендиле.

- «Единая Россия» партия къыралны 2023-2025 жыллагъа бюджети бла байламлы ишлегенинде, саулукъ сакълауну финансла бла жалчытыугъа бютюн уллу эс бурлукъду. Алай бла адамланы партияны халкъ программасына тюшген оюмларын толтурургъа къолдан келликди. Партия бу бёлюмню ал кесегине бютюн уллу эс бурургъа таукелди. Нек дегенде аны жангыртыу программаны андан ары бардырыргъа тийишлиди, - дегенди халкъ программаны «Адамны саулугъу» деген кесегини башчысы, Къырал Думаны саулукъну къоруулау жаны бла комитетини таматасы Дмитрий Хубезов.

Ол айтханнга кёре, быйыл бу программаны кёп кесеклери 80 процентге тамам этилгендиле. Сёз ючюн, медицина организацияланы къурулушу эмда аланы жангыртыу, медицина техника эмда санитар транспорт сатып алыу.

Бюджетни къурагъанда, импортну алышыугъа да тийишли эс буруллукъду. Сёз мында медицина оборудованияны эмда дарманланы толусунлай кесибизде этилген материалладан бла башха затладан чыгъарыуну юсюнден барады. «Федерал бюджетни проектинде фармацевтиканы эмда медицина промышленностьну айнытыу жумушлагъа беш миллиард сом бёлюннгенди. Ишни къыйматы жууукъ заманда окъуна чыгъарча ол ахча жетерикмиди огъесе угъай – аны да сагъышын этерге керекди», - дегенди Дмитрий Хубезов.

Ючюнчюсю – ЛНР, ДНР, Херсон эмда Запорожье областьлада жашагъанлагъа медицина жаны бла себеплик этиу. «Анда Россейге къошулур хыйсап бла референдумла бардырылгъандыла. Аны себепли алагъа медицина болушлукъну бар тюрлюлерин берирча ахча бёлюрге кереклисин ойларгъа тийишлиди», - деп чертгенди депутат.

Андан сора да, медицина реабилитация системаны айнытыуну, жангы оборудование сатып алыуну да тохтатмазгъа, жюрек-тамыр аурууладан къыйналгъанланы хакъсыз дарманла бла жалчытыуну сагъышын да этерге керекди, дегенди Дмитрий Хубезов.

- «Единая Россия» партия жангы бюджетни сюзгенде шёндюгю жашауну эмда адамларыбызны излемлерин эм башына салыргъа таукелди. Ала бары да партияны халкъ программасында кёргюзтюледиле. Ол а неди десегиз – эм алгъа адамлагъа себеплик этиудю. Бизни къыралгъа, экономикагъа шёндю этилген басымгъа да къарамай, ол кесини социал борчларын толусунлай толтурургъа керекди, - дегенди Къырал Думаны Жарыкъландырыу жаны бла комитетини башчысы, партияны халкъ программасында «Шёндюгю билим бериу эмда алчы илму» бёлюмюню оноучусу, депутат Ольга Казакова.

Ол айтханнга кёре, билим бериуде проектлени финансла бла жалчытыргъа кереклисин эсде тутаргъа тийишлиди. Ол санда школлагъа тынгылы ремонт этиу эмда 1-4-чю кассланы окъуучуларына жылы аш бериу программаланы, урунуу рынокда сурам уллу болгъан кадрланы хазырлау жаны бла «Профессионалитет» проектни да.

Ольга Казакова оюм этгенича, школланы башчыларыны окъутуу жаны бла кенгешчилерини институтун айнытыуну эмда аллай ишчилени онгдурууну юсюнден да унутургъа жарамайды.

Огъарыда сагъыннганыбызча, федерал бюджетни келир жылгъа эмда 2024-2025 жыллагъа бюджетини проекти Къырал Думагъа сюзюуге берилгенди.