Терек бахчачыла бай тирлик сакълайдыла

 Республикада терек бахчачылыкъ мюлкледе алмаланы къыш сортларын жыйыу башланнганды. КъМР-де ёсдюрюлген жемиш эмда наныкъ продукцияны арасында быллай алмала аслам жерни аладыла, дегендиле регионну Эл мюлк министерствосунда.

Тергеулеге кёре, быйыл организацияла, элчи мюлкле эмда предпринимательле жемишлени бла наныкъланы бар тюрлюлеринден 200 мингден аслам тонна жыйгъандыла. Андан экиден бирин иели мюлкледе ёсдюргендиле.

Бахсан районда да бу иш тири барады. Муниципалитетни тийресинде алма бахчала 1888 гектарны аладыла. Терк айныгъан бахчаланы ёлчеми уа андан да кёпдю – 2353 гектар. Специалистле оюм этгенлерине кёре быйылгъы тирлик 80 минг тоннагъа жетерге боллукъду.

Жыйылгъан алмаланы бузулмай турурча сууукъда сакълагъан «Сады Баксана» эм «Агрохолод» предприятиялагъа жибередиле. Аланы экисини да тийишли объектлерине 24 минг тонна продукция сыйынады. Алада алмаланы айырыучу, орунлагъа жыйыучу комплекс да ишлейди.

Терек бахчачылыкъда уруннганла айтханларына кёре, ишге быйыл кюнню халы себеплик этгенди. Анга кёре былтырдан эсе асламыракъ тирлик боллукъду, дейдиле. 2021 жылда уа, эсге сала айтсакъ, ол кёрюмдю 535,5 минг тоннагъа жетген эди.