Багъылырдан алгъа – эсгертиу

Кюз жетгени бла кесекле, тамакъ ауруула къозгъаладыла, бу аурууланы адамны къарыусуз этгенлеринден сора дагъыда бир осал жанлары ала терк жукъгъанларындады. Кесекле тийгенини неда бир башха аурууланы ышанларын эслегенлей, кёп адамла антибиотиклени мардасыз хайырланып башлайдыла, ол угъай, сабийлеге да врач бла кенгешмегенлей бередиле. Гитчелени аллай кючлю дарманла бла багъыу алада аллергияны къозгъаргъа боллукъду – быллай эсеплеге алимле келгендиле.

Специалистле 44 тинтиу ишлени эсеплерине къарагъандыла, алагъа 600 минг пациент къатышханды. Медицина порталдан билдиргенлерине кёре, тинтиуле 1996 жылны январындан башлап 2015 жылны ноябрине дери бардырылгъандыла. Бу заманны ичинде 1-2-жыллыкъ балалагъа антибиотиклени бериу бла артда алада экзема неда сенный лихорадка къозгъалгъанларыны араларында байламлыкъла болгъаны бла къалгъаны тохташдырылгъанды. Алай бла экзема быллай дарманла ичгенлени араларында 14-41 процентге кёп табылгъанды, сенный лихорадкадан аурургъа къоркъуу а 14-56 процентге кёбейгенди. Сабий антибиотиклени эки курсун ётсе уа, аллергиядан къыйналырына къоркъуу бютюн уллу болгъанды.

Алимле оюм этгеннге кёре, аны талай сылтауу барды. Бек алгъа, антибиотикле чегилени микробиомларын бузадыла.   Сора, гитчелеге антибиотиклени ичириу семизликге келтиргенин тохташдырылгъанды. Ала, 3-18-жыллыкъланы халларын тинте, бу дарманланы аслам хайырланнганла бир жылны ичинде 1,5 килограммгъа семиргенлерин, артда уа артыкъ ауурлулукъларындан къыйналып къутулгъанларын айтхандыла.

Битеу бу тюрлениуле препаратла чегилени микрофлораларын бузгъанлары ючюн чыгъадыла. Аны ючюн врачла ата-аналаны сабийлеге быллай кючлю дарманланы берирден алгъа иги сагъыш этерге чакъырадыла.  Антибиотиклени курсун жангызда билимли специалист жазаргъа керекди. Сора, ала битеу инфекция аурууланы багъыуда бирча хайырлы болмагъанларын да эсде тутаргъа тийишлиди.