Хорламны жоллары унутулмазча

Черек районну Бабугент элиндеги Деппуланы Хаким атлы 2-чи номерли кадет школда «Хорлам болдургъанланы жоллары бла» деген аскер-патриот оюн бардырылгъанды.  Оюн Уллу Ата журт урушда хорламны 77-жыллыгъына эмда Къабарты-Малкъар Республиканы 100-жыллыгъына жораланнганды. Аны юсюнден бизге Черек районну жер-жерли администрациясыны пресс-службасыны башчысы Бёзюланы Залина билдиргенди.

Жаш тёлюню патриот ниетледе юйретиуге жораланнган ишге Черек районда жаш аскерчилени отрядлары, битеу билим берген окъуу юйлени   аскер-патриот клубларыны къауумларына киргенле къатышхандыла.

Оюн башланырдан алгъа жашланы бла къызланы аллында районну Ветеранларыны советини председатели Чеченланы Георгий, район администрациясыны Билим бериу управленияны башчысыны къуллугъун толтургъан Жуболаны Марианна да сёлешгендиле. Ала ёсюп келген тёлюню Ата журтну сюерге, аны не заманлада да багъаларгъа, сакъларгъа чакъыргъандыла. Андан сора да, ала жаш адамла жетишимли болурларын сюйгенлерин билдиргендиле эмда бу оюн сабийлени аскер-патриот эмда инсан-патриот ниетледе юйретиуге, саулукълу жашау хал бардырыргъа жораланнганын да айтхандыла.

Оюнну программасына тюрлю-тюрлю эришиуле киргендиле: теория жаны бла «Эсибизде тутабыз эмда ёхтемленебиз», кесини юсюнден хапарлау, ГТО жаны бла спорт эришиу, аскер-турист амалланы кёргюзтюу.

Командаланы бары да оюннга тынгылы хазырланнганларын чертип айтырчады. Аны себепли жюрини къауумуна эм игилени айырыу да тынч болмагъанды.  Алай бла  ючюнчю жерге  Къашхатау эмда Бызынгы эллени  къауумлары чыкъгъандыла. Экинчиге уа Огъары Малкъардагъы 1-чи номерли мектепчиле, баш саугъа-кубок а  аушигерчилеге жетгенди.

Холаланы Марзият.
Поделиться: