Эл мюлкде ишле къыстау барадыла

Ётмек бишириучюлеге - себеплик

Къабарты-Малкъарда ётмек бишириучю предприятияланы быйыл ал эки кварталда къоранчларыны бир кесегин къайтарыргъа деп белгиленеди. Бу субсидияны бериуню жорукълары хазырдыла, документлени алыу а 26 сентябрьде башланырыкъды эмда жетинчи октябрьге дери барлыкъды, деп билдиргендиле КъМР-ни Эл мюлк министерствосундан.

Алай бла, быллай болушлукъ излегенле, документлерин жарашдырып министерствогъа жиберирге керекдиле. Аны адреси: Нальчик, Ленин атлы проспект, 27. Соруулары болгъанла 408841, 407150, 409422, 408647 телефон  номерлеге сёлешсинле неда mcx@kbr.ru электрон почтагъа жазсынла.

Чёплеуню оруу башланнганды

Бахсан районда Баксанёнок, Куба, Кишпек, Исламей эм Псыхурей элледе чёплеуню оруп башлагъандыла. Муниципалитетни Эл мюлк управлениясындан билдиргенлерине кёре  быйыл ол 5016 гектарда ёсдюрюледи. Бу кюнлеге аграрчыла  2350 гектарда ишни тамамлагъандыла. Алай  бла бир гектардан 25 центнер жыйгъандыла.