Командабыз «алтынсыз» къалгъанды

Грозныйде Россейни Югуну халкъларыны маданият эм спорт фестивальлары бардырылгъанды. Анга къыбыла регионладан сора да, Абхазиядан, Донецк эм Луганск халкъ республикаладан мингден аслам спортчу къатышхандыла.

Фестивальны къууанчлы халда ачылыуунда Чечен Республиканы башчысы Рамзан Кадыровну алгъышлау сёзю окъулгъанды. Бай маданият программа, спортну онеки тюрлюсюнден эришиуле къараучулагъа, делегацияланы келечилерине да сейир кёрюннгендиле.

Спорт эришиуле эки кюнню ичинде бардырылгъандыла, аланы эсеплерине кёре, республикабызны командасы алтынчы жерни алгъанды. Алай болгъанлыкъгъа, бир миллиондан аз адам жашагъан субъектлени араларында биринчи жерге чыкъгъанды. Бу жол спортчуларыбыз алтын майдалланы алалмагъандыла.

Экинчи жерлеге садакъдан атдырыуда Наталья Кулюшина, жюгю бла тачканы ары-бери элтиуде Аниуар Шогенов, юзмезден толу къапны узакъгъа атыуда Александр Добренький эм жюк ташыуда Рамазан Нагоев чыкъгъандыла. Канатны тартыуда гёжефлерибиз ючюнчюле болгъандыла. 

 Биринчи жерни бу жол да Чеченни къаууму, «кюмюшню» - Дагъыстан, «доммакъны» уа Краснодар край алгъандыла.

Фестиваль жыл сайын Россейни Спорт министерствосуну башчылыгъы бла бардырылады, анга, тёреде бола келгенича, эм иги спортчула бла чыгъармачылыкъ къауумла къатышадыла.