Ахшы жумушлагъа къатышыргъа чакъыргъандыла

29 сентябрьден башлап, битеу къыралда да #МЫВМЕСТЕ битеуроссей волонтёр къымылдауну регионлада штаблары ачылгъандыла. Аланы келечилери энчи операциягъа къатышханлагъа, мобилизациягъа тюшгенлеге эмда аланы юйюрлерине себеплик этерикдиле, ол санда юридический, психология жаны бла да. Ол  угъай, юй жумушланы толтурургъа, сабийлени эркин заманларын къураргъа, аланы репетиторгъа, паркга окъуна элтирге,  экзаменлеге хазырланыргъа да   болушурукъдула волонтёрла. 

Къабарты-Малкъарда сагъынылгъан къымылдауну штабыны бёлюмлерин битеу районлада эмда билим бериу учреждениялада, ол санда бийик эм орта профессионал билим бергенледе, ачаргъа мурат барды. Бу иш къалай къураллыгъын эмда бёлюмлени борчларын а бу кюнледе Жаш тёлюню ишлери жаны бла министерство эм Волонтёр къымылдауну айнытыу жаны бла ресурс ара бардыргъан жыйылыуда сюзгендиле. 

Аны ача, жаш тёлюню ишлери жаны бла министр Азамат Люев шёндюгю кезиуде жаш тёлюе къыралда бола тургъан ишледен бир жанында къалыргъа жарамагъанын белгилегенди.  «Энчи операциягъа къатышхан аскерчилени, мобилизациягъа тюшгенлени юйюрлери кеслери алларына къалмагъанларын сезерге керекдиле. Ахча, ырысхы жаны бла алагъа къырал, республика да этедиле себеплик. Бизни уа  психология, юридический жаны бла болушургъа къолубуздан келликди»,– дегенди ол.

Министр жамауат, волонтёр, ветеран, башха организацияланы, жууаплылыкъны сезген инсанланы барысын да штабны ишине къошулургъа чакъыргъанды.  «Къыйын кезиуледе жамауат биригеди, адамла бир бирлерине билеклик этедиле. Бюгюн да къыралыбызда болум тынч тюйюлдю. Алай барыбыз да бирге болуп, аладан бет жарыкълы къутуллугъубузгъа ийнанама»,– деп къошханды ол эмда республиканы хар инсанын да ахшы ишлеге къатышыргъа чакъыргъанды. 

Тюбешиуде Волонтёр къымылдауну айнытыу жаны бла ресурс араны башчысы Залина Кушхова да сёлешгенди. Ол а энчи операциягъа къатышхан аскерчилени, мобилизациягъа тюшгенлени юйюрлерине болушлукъ бериу къалай къуралгъаныны юсюнден айтханды. 

Эсигизге салайыкъ, башда айтылгъан къымылдау 2020 жылда башланнганды. Волонтёрла коронавирус жайылгъан кезиуде къыйын жашау болумгъа тюшгенлеге болушуп тургъандыла: дарманла, аш-суу алып, башха излемлерин толтуруп.  

Аны штабы Нальчикде Волонтёр къымылдауну айнытыуну ресурс арасында орналыпды. Болушлукъ излегенле   ары келирге боллукъдула.
Аны бла бирге уа «къызыу ызны» федерал телефон номери ишлеп башлагъанды.  Ол   хакъсызды, кеси да сау кюнню ишлейди.  Болушлукъ керек болгъанла аны юсюнден бу номерге сёлешип билдирирге боллукъдула: 8–800–200–3411.