Жетишимлери бла къууандырады

Озгъан ыйыкъда Нальчикде каратени зёндакай тюрлюсюнден республикалы турнир ётгенди. Ол  зёндакайны КъМР-де  бёлюмю къурап бардырылгъанды.
Каратени бу тюрлюсю регионда арт жыллада кенг айный барады. Нальчикде бардырылгъан эришиуле да анга шагъатдыла. Къаты сермешледе жаш спортчула кеслерини усталыкъларын бла хазырлыкъларын кёргюзтгендиле.
Шёндю «Эльбрус» спорт клубда тренер Жантуудуланы Азаматда жарау этген Мисирланы Алий кеси жыл санында бла ауурлукъ категориясында (55кг.)  бу турнирде алчылыкъны жибермегенди. Финал сермешде хорлап, ол алтын майдал къоллу болгъанды.
Спортчу дагъыда Огъары Малкъарда тренер Мисирланы Элдарда эркин тутушуу бла да кюрешеди.
Эсигизде эсе, бир ненча  жыл мындан алгъа газетибизде Минги таугъа чыкъгъан огъары малкъарлы онжыллыкъ жашчыкъны юсюнден жазгъан эдик? Ол Алий эди. Бюгюнлюкде  ол ышандыргъан жаш спортчуларыбыздан бириди.