Къурулушда проектле къалай тамамланнганларын сюзгендиле

КъМР-ни Башчысы Казбек Коков видео связь амал бла Регионланы айнытыу жаны бла правительстволу комиссияны жыйылыууна къатышханды.Жыйылыуну РФ-ни Правительствосуну Председателини орунбасары Марат Хуснуллин бардыргъанды, анда РФ-ни къурулуш эм жашау-журт коммунал мюлк министри Ирек Файзуллин доклад бла сёлешгенди. 

Жыйылыугъа къатышханла миллет проектле, федерал эм регион программала, инфраструктура проектле, ол санда бюджетден ёнкюч алып ишленнген къурулушла къалай тамамланнганларына къарагъандыла.

Къабарты-Малкъарда жылны ахырына дери Нальчикде энчи юйле ишленирик жерледе суу эм канализация барлыкъ орамлада быргъыла тартылып бошаллыкъдыла. «Таза суу» регион программаны чеклеринде районлада онюч объектде къурулуш эм жангыртыу ишле бардырыладыла. Солдатскоеде бла Пролетарскоеде суу чыгъаргъан скважиналада къурулуш ишле бошалгъандыла. Анда сора да Элбрус элден Азау талагъа канализация баргъан быргъыланы алышындырыу башланнганды.

Нальчикде кир суула жыйылгъан жерни проекти этиле турады.Оюла тургъан юйледен адамланы кёчюрюу программагъа кёре, битеу да 17 минг квадрат метри болгъан 62 кёп фатарлы юйде жашагъан 1020 адам, жашау болумларын игилендиргендиле. Авариялы юйледен инсанланы кёчюрюу ишле андан ары бардырыллыкъдыла.

Республикада жашау журтла бла байламлы къурулуш ишле тири бардырыладыла. Январь айдан тебиреп августха дери 304,5 минг квадрат метр жашау журт ишленнгенди. Озгъан жыл бла тенглешдиргенде ол кёрюмдю 135 процентни тутады. Андан сора да, 104 минг квадрат метри бла 1821 фатары болгъан 52 юй ишленнгенди. Жылны аягъына 55 кёп фатарлы юйню арбазы эм жамаут солугъан жерле тапландырыллыкъдыла, дагъыда 85 кёп фатарлы юйге тынгылы ремонт этилликди.

Къурулуш ишле социал магъанасы болгъан объектледе ол санда,  сабий садла, мектепле, маданият юйле, тюрлю-тюрлю спорт комплексле ишленирикдиле, деп билдиреди КъМР-ни Башчысыны бла Правительствосуну пресс-службасы.