Пациентни сейирлери – биринчи жерде

Къабарты-Малкъарны Жамауат палатасында саулукъ сакълауну биринчи звеносун игилендириу жаны бла регион программа къалай толтурулгъанын сюзгендиле.

Палатаны социал политика, саулукъ сакълау, физкультура эм спорт жаны бла комиссиясыны башчысы Галина Егорова эсгертгенича, къыралны Президентини «Россей Федерацияны айнытыуну 2024 жылгъа дери миллет эм стратегия борчларыны юсюнден» буйругъуна тийишлиликде Къабарты-Малкъарда 2021-2025 жыллада саулукъ сакълауну игилендириуню юсюнден программа жарашдырылгъанды. Анга кёре адамлагъа биринчи медико-санитар болушлукъну, ол санда элледе бла гитче шахарлада, женгилирек этиуню, пациентни сейирлерин эм башына салыуну, инсанны саулугъуна къарагъанда аны сейирлерин сакълауну юсюнден айтылады.

Аны жашауда бардырыугъа федерал эм республика бюджетледен 1804872,90 минг сом бёлюннгенди. Берилген ахчагъа 13 багъыу учреждение ишлерге, 2 саулукъ сакълау учрежденияны жангыртыргъа, 38 объектге толу ремонт этерге белгиленеди. Андан тышында, биринчи медико-санитар болушлукъну этерча дарманла эм башха керекле да алынырыкъдыла.

Саулукъ сакълау министрни орунбасары Марат Кармов 2021-2022 жыллада целевой кёрюмдюле къалай толтурулгъанларыны юсюнден билдиргенди. Алай бла былтыр ведомство 86045,0 минг сомгъа 105 медицина оборудование алгъанды, ол а экономияны хайыры бла планда бегитилгенден аслам окъуна болгъанды. Быйыл 65184,4 минг сомгъа 31 медицина оборудование келтирилгенди, республиканы бюджетинден къошакъ халда берилген ахчагъа дагъыда эндоскоп видеопроцессор алыннганды. 

Палатаны башчысыны орунбасары Людмила Федченко саулукъ сакълау министерствону келечисине бардыргъан ишлери ючюн ыразылыгъын билдиргенди. Аны бла бирге ол энчи медицина усталыкълада специалистле, бютюнда уа элледе жетишмегенлерине эс бургъанды. Марат Кармов ангылатханыча, бюгюнлюкде республикада «Земский доктор» эм «Земский фельдшер» программала ишлейдиле, эки жылны ичинде эллеге 51 медик жиберилгенди.

Фатима Гешева бла Наталья Шинкарева Нальчикде 1-чи номерли поликлиниканы жангы мекямын ишлеуню юсюнден соргъандыла. Билдирилгенича, поликлиника бу программагъа кирмегенди, алай аны къурулушуну юсюнден келишим 3 жылгъа тауусулгъанды, алай бла бир кесекден ол диагностика ара боллукъду.

Палатаны келечиси Чеченланы Георгий Черек районда жангы район больницаны ачыуну сорууун кётюргенди. Ол чертгенича, бусагъатдагъы медицина мекям 1958-1959 жылда ишленнгенди, ол тозурагъан халдады. Министрни орунбасары Зольск, Бахсан, Черек эм Элбрус районлада жангы больницаланы къурулушларына 7 миллиард сом керек болгъанны айтханды. Ведомство бу сорууну энчи къарауунда тутады эм башха программаланы болушлукълары бла тамамларгъа кюрешеди, ол санда «Эллени комплексли айнытыуну» программагъа кёре да.

Жыйылыуну эсеплерине кёре эсгертиуле жарашдырылгъандыла. Ала сейирлери болгъан ведомстволагъа бла органлагъа жиберилгендиле, деп билдиредиле Жамауат палатаны пресс-службасындан.