Жангы микрорайонлада суу ызла

Нальчикде «Восточный» деген жангы микрорайонда къурулуш ишле барадыла. Тергеулеге кёре, анда бир миллиондан артыкъ квадрат метр жашау журтла боллукъдула. КъМР-ни Къурулуш эмда жашау журт-коммунал мюлк министерствосундан билдиргенлерича, ол тийрени инфраструктура бла жалчытыу шёндю эм магъаналы ишди. Биринчиден а, анда канализация ызланы эмда суу бла жалчытхан системаны къурарыкъдыла.

Алай бла бу кюнледе анда кабель ыз тартылгъанды. Аны узунлугъу юч километр болады. Специалистле дагъыда суу эмда канализация быргъыладан бешишер километрден артыгъын орнатхандыла. Тийишли къуюланы ёлчеми уа къыркъдан атлайды. Келир жылны ахырына дери суу ызланы узунлугъун – 30 километрге, канализация сетьни узунлугъун а 20 километрге жетдирирге дейдиле.

Быллай ишле дагъыда «Эркин Ёзен» микрорайонда барадыла. Министерствода айтханларына кёре, быйылны ахырына дери анда жарашдырыллыкъ суу ызланы узунлугъу кёп къалмай онтёрт километр боллукъду, канализация сетьлени узунлугъу уа 13,75 километрге жетерикди. Бюгюнлюкде сегиз километрден артыкъ канализация быргъы орнатылгъанды. Суу бла жалчытыуну юсюнден айтханда уа, тийишли сеть 10,5 километрге жетгенди. Ишле «Жашау журтла эмда шахар болум» миллет проектни чеклеринде барадыла.