Жётелни хар тюрлюсюню кесини энчи дарманы …

Жай озгъанлай, сууукъла бла бирге бирде жётел да тиеди. Андан багъылыуну дарманлары  кёпдюле, аладан асламысы рецептсиз сатыладыла. Болсада аладан бек къыйматлысын къалай сайларгъа боллукъду? Аны юсюнден биз  практикалы  врач Мокъаланы Лейля бла ушакъ этгенбиз.

-Жётел этип башлагъанлай, не зат этерге керекди?

-Не тюрлю багъыу да  диагнозну тохташдырыудан башланады. Жётелден ауругъан саусузгъа уа аны  магъанасы бек уллуду: бир тюрлю жётелден багъылыргъа  жарагъан дарман ол аурууну башха тюрлюсюнден къутулургъа арталлыда болушмайды, аны къой, адамгъа хата окъуна келтиреди.

Жётелигизге, эс буруп, тынгылачыгъыз. Сизни тамагъыгъызны чибижи кюйдюргенча бола эсе,  эм тохтаусуз  жётел къыйнай эсе, аны хатасындан жукълаялмай эсегиз, ол къургъакъ жётелди. Быллай жётелге врачла непродуктивный дейдиле: аны кезиуюнде кёкюрек тийреле  бек арыйдыла эм къыйнайдыла, алай бизни чархыбыздан бир тюрлю продукт (хыппирик, бурун суу) чыкъмайды. Ол бош, тамакъда жётел рецепторланы къозгъагъан  къургъакъ жётелди. Андан жётелге къажау дарманланы болушлукълары бла къутулургъа боллукъду.

-Дарманладан сора да, юйню ичинде болум жётел бла байламлы болургъа боламыды?

-Хау, юйде болумну магъанасы да уллуду – отоуну ичинде  таза, мылыракъ  хауа болургъа тийишлиди. Алай болур ючюн а, отоуну ичинде суу къуюлуп тургъан тазны тутаргъа неда сууда жибитилген жан жаулукъну тагъып турургъа керекди. Суусун затланы да не къадар кёп-кюнню ичинде бек азындан 6-8 стаканын - ичерге керексиз.

-Халкъ амалла уа жараймыдыла?

-Сёзсюз, жётелни тохтатыргъа кёп халкъ амалла бардыла. Сютню къайнатып, ол бираз сууугъанлай, жылылай анга, сары жау къошуп ичедиле. Дагъыда, бир жыйырма – отуз минутха кёкюрекде эм сыртынга жюрекден къалгъан башха жерге хобуста чапыракъланы  салыргъа болады. Аланы  чапыракъны къайнагъан суугъа  жабышдырып, ызы бла бал сюртюп бир жанына, бал жаны бла уа кёкюрекге, сыртха салып, юсюн целлофан эм бир жылы зат бла жабаргъа керекди. Быллай компресни кечеге къояргъа жарамайды. Алай, халкъ мадарла бла да, врач айтмай, хайырланмагъыз.