Аскер махтаулукъну белгисине саналлыкъды

Георгий тасманы Россейни аскер махтаулугъуну эмда Уллу Ата журт урушда Хорламны  белгилерини тизмесине кийирирге белгиленеди. Ол жаны бла законну проектин Къырал Думаны депутатлары биринчи окъулууда къабыл кёргендиле.

 Алай бла, документге тийишлиликде, Георгий тасманы эмда аны суратын инсанла, жамауат биригиуле, предприятияла, учрежденияла бла организацияла жаланда Россейни аскер махтаулугъуну белгисини даражасында жюрютюрге, хайырланыргъа эркин этиледиле.  Аны халкъны аллында сыйсыз кёрген, РФ-ни законларына тийишлиликде, уголовный неда административ жууапха тартыллыкъды.

Аскер махтаулукъну белгисин сыйсыз кёрюу бла байламлы  аманлыкъ этген инсаннга, законлагъа кёре,  тазир 3 миллион сомгъа дери жетеди, неда аны эркинлиги юч жылгъа сыйырылыргъа боллукъду. Организациягъа уа 3-5 миллион сом тёлерге тюшерикди. Къауум адам быллай бузукълукъну алгъадан келишип этсе, неда интернетде басмаласа, тазир 2-5 миллион сом боллукъду, неда инсанны эркинлиги 5 жылгъа дери сыйырылады.