Медицина жумушла ючюн къоранчланы къайтарырча онгла

Инсан саулугъуна бакъдыргъанда эмда дарманла сатып алгъанда этилген къоранчланы бир кесегин артха къайтарыргъа онг барды. Бу материалда аны къалай этерге боллугъун юйретирге сюебиз.

Къаллай жумушла ючюн

Бу тёлеулени алыргъа ким эркинди? Биринчиден, инсан кесини, юй бийчесини, атасыны, анасыны, неда сабийлерини саулукъларына бакъгъан кезиуде къоратхан ахчаны бир кесегин къайтарыргъа боллукъду. Ол санда бийик технологиялы болушлукъ берилгенде. Сабий ючюн ахчаны ата-анасы ол акъылбалыкъ болгъунчу,  неда ол очно халда билим алгъан кезиуде (24 жылгъа дери) алыргъа эркин болгъанын айтырчады. Врач жазгъан дарманланы сатып алгъанда къоранчланы бир кесеги да артха берилирге боллукъду.

Къаллай ёлчемде

Жылны ичинде къайтарылгъан ахчаны ёлчеми 120 мингден озмайды. Битеу социал налог вычетле бирге къошулгъанларын айтырчады, сёзге,  билим алыугъа, саулукъгъа, урунуу пенсияны тёлеуге этилген къоранчла бирге къошуладыла.  

 Алай артыкъда багъалы медицина жумушла толтурулгъан кезиуде къоранчла толусунлай къайтарыладыла, бу кезиуде башында салыннган чекле хайырланылмайдыла.

Къаллай кезиуде

Медицина жумушла ючюн этилген къоранчла тийишли лицензиялары болгъан организациялада, неда энчи предпринимательледе бакъдыргъан кезиуде къайтарылады. Аны къаллай бир ахча тёлегенине шагъатлыкъ этген документлери болургъа керекди.  Аланы организация берирге борчлуду. Ансыз налог органла ахчаны къайтарыуну юсюнден оноуну къабыл кёраллыкъ тюйюлдюле.

Налог вычет къаллай жумушла ючюн къайтарылгъаныны тизмеси РФ-ни Правительствосу 2021 жылда 8 апрельде чыгъаргъан 458-чи номерли бегиминде белгиленипдиле.

Дарманла ючюн тёлеуле                                                      

Врач жазгъан дарманланы сатып алгъан кезиуде да къоранчланы артха къайтарыргъа онг барды. Бу кезиуде уа рецепт керекди. Врач дарманланы къагъытда жазып береди.  Болсала аны электрон амал бла жарашдырыргъа да боллукъду, пациентни ыразылыгъы бла. Бу жаны бла жорукъла РФ-ни Правительствосу 2021 жылда 24 ноябрьде чыгъаргъан 1094н номерли бегиминде белгиленипдиле.

Рецепт жарашдырылмагъан кезиуде (сёзге, стационарда) саусуз дарманны сатып алгъанына шагъатлыкъ медицина документле этерге боллукъдула.

Къалай алыргъа жарайды

Ахчаны эки тюрлю алыргъа боллукъду: уруннган жерде, неда налог органлада.

Налог органланы жумушлары бла хайырланнган кезиуде 3-НДФЛ декларацияны толтурургъа тийишлиди. Аны ючюн а жылны ичинде алгъан файданы, тыйылгъан налогланы юслеринден документ керек боллукъду. Аны  ишде алыргъа керекди.

Декларация къалай толтурулгъаны  Федерал налог службаны сайтында басмаланыпды. Битеу документлени жыйышдырып, жашагъан жерде налог органлагъа келтирирге жарайды. Аланы юч айны ичинде тинтедиле. Жорукъла барысы да сакълансала, вычет инсаннга бир айны ичинде тёленирикди.