Халкъ чыгъармачылыкъны ариу чакълары

Бу кюнледе Сочи шахарда Халкъла аралы артий комитет къурап «Ариулукъ эм чомартлыкъ  дунияны сакъларыкъдыла!» деген жыйырма биринчи халкъла аралы  хореографиядан олимпиада  бардырылгъанды. 

Аны къууанчлы халда ача, комитетни вице-президенти Ауес Бетуганов былай  дегенди: «Бу  эришиу тёреге айланып, кенг белгили болгъанды. Жылдан-жылгъа аны тизгинлерине  асламдан аслам жангы коллективле къошула келедиле.  Ол а олимпиаданы магъаналылыгъыны шартыды. Бюгюнлюкде биз жер-жерли къырал власть органланы, миллет-культура араланы эмда жамауат  биригиулени ышаннгылы партнёрларыбыз, Россейде, дунияда да мамырлыкъ, тынчлыкъ болур ючюн кюрешебиз. Сёзсюз, бюгюннгю бизни чакъырыуубуз бла этилген бу огъурлу  жумуш а анга  себепликди».

Олимпиадагъа башха-башха чыгъармачылыкъ къауумла къатышхандыла.  Аланы араларында Армениядан, Гюржюден, Грециядан, Къабарты-Малкъардан, Север Осетия-

Аланиядан, Юг Осетиядан, Къарачай-Черкесден, Дагъыстандан, Чечен Республикадан, Ингушетиядан, Адыгеядан, Ставрополь, Краснодар крайладан, Москвадан, Санкт-

Петербургдан эмда  Россей Федерацияны  башха шахарларындан келген  артистле.

Олимпиадагъа къатышхан хар коллектив да сейирлик номерлерин кёргюзтгендиле. Аланы сахна кийимлери да  эс бурурча эдиле. Аны себепли  жюрини къауумуна эм игини сайлау да тынч  иш болмагъанды. Ала олимпиадагъа къатышханлагъа тёрт тюрлю  жаны бла багъа берирге керек эдиле.  Аны къауумуна уа «Кабардинка» къырал академиялы тепсеу ансамбльни  художестволу башчысы Игорь Атабиев, КъМР-ни сыйлы артисткасы  Гуртуланы Лейля, дагъыда Россейден, Грециядан, Гюржюден маданият ишчиле киргендиле.

Конкурс баргъан кезиуде  хореографияны айнытыу жаны бла мастер-классла, «тёгерек столла», чыгъармачылыкъ лабораторияла, шуёхлукъну ингирлери, сейирлик адамла бла тюбешиуле да болгъандыла. Сочини къонакълары  аны айбат жерлерин, спорт майданларын да кёргендиле. Коллективлени Сочи шахарны бир къауум предприятияларыны бла организацияларыны келечилери чакъырып къонакъбайлыкъ да этгендиле. Жарыкъ тюбешиуле уллу концерт программа бла бошалып тургъандыла.  

Екатеринбургдан келген  коллективни башчысы  Евгений Нижников  алагъа жыйылгъанлагъа жарыкъ тюбегенлери, Сочи шахарны кёп айбат жерлерин кёргюзтгенлери ючюн уллу ыспас этгенди. Север Осетия-Аланиядан эмда Гюржюден келген коллективлени къауумлары уа шахарны культура эм солуу паркыны бек ариу жерлеринде, спорт майданларында болуп, аланы бек жаратханларын чертгендиле.  Коллективле  аланы майданларында  да тепсеп, ары келгенлени кёллерин алгъанларын билдиргендиле. 

Тбилисиден келген къауумну башчысы Ия Табидзе уа  «Ариулукъ эмда чомартлыкъ дунияны сакъларыкъдыла!» ат бла бардырылгъан бу олимпиада  алагъа кёп къууанчлы сагъатланы саугъа этгенин, бирси  чыгъармачы коллективлени къауумлары бла  шагъырейленирге онг бергенин да чертгенди. Ставрополь крайдан «Малиновый рай», Дагъыстан

Республикадан «Тауланы жашлыкълары» ансамбльлени башчылары Светлана Мякишева, Мурат Бабоев  эмда  Дамалудин Омаров да Дуния артий комитетни Шимал Кавказда келечисини быллай тюрлю сейирлик конкурсланы, фестивальланы, олимпиадаланы къурауда уллу сынам жыйышдыргъанын эмда ишин тынгылы бардыргъанын белгилеп айтхандыла.

Олимпиаданы ахырында, тёреде болуучусуча,  коллективле  бирге  жыйылгъандыла. 

– Хореография жаны бла халкъла аралы олимпиаданы баш борчу дунияны жаш тёлюсюн бирикдириуге, маданиятны хайырындан бир бирни  ариу тепсеулери, тёрелери  бла шагъырейлендириуге бурулупду. Конкурсха къатышхан хар коллектив да  бек аламат, сейирлик номерлерин кёргюзтгендиле. Жюрини къауумуна да  бек игини белгилеген алай тынч иш болмагъанды,-дегенди ол чакълада Ауес Бетуганов.

Эришиуню сыйлы саугъасы – Гран-при – бу жол эки  коллективге жетгенди. Аладан бири Къабарты-Малкъар Республикадан «Псыгансу» коллективди. Ол халкъ тепсеуле жаны бла  алгъа чыкъгъанды.  Аны художестволу башчысы Хажмурат Мизовду. Экинчи саугъаланнган коллектив а – Ставрополь крайны Кисловодск шахарындан «Гармония» ансамбль.

Классика тепсеуде анга жетген болмагъанды. Аны художестволу башчысы Людмила Литвиненкоду. 

Олимпиаданы къураучуларыны председатели Ауес Бетуганов айтханнга кёре, башха коллективлени чыгъармачылыкълары да алчыладан хазна артха къалмагъандыла. Ызы бла жыйылгъанла, Къара тенгизни жагъасында солуп, юйлерине атланнгандыла.