Жолда эсли болургъа чакъыргъандыла

Нальчикде школланы тийрелеринде жолдан къоркъуусуз къалай  ётерге жарагъанын ангылатыу жазыула этилгендиле. Бу жумуш жолда жюрюуню къоркъуусузлугъуну битеуроссей ыйыгъыны чеклеринде къуралгъанды.

  Школчула жолдан жаяу ётген жерледе ГИБДД-ны къуллукъчулары жарыкъ бояула бла сакъ болургъа, жорукъланы сакъларгъа, жол белгилеге бойсунургъа кереклисини  юсюнден жазыула этгендиле. Инспекторла жолдан ётген кезиуде наушниклени тешерге, телефон бла сёлешмезге, эсли болургъа  да чакъыргъандыла.   

- Жорукъла  бек женгилдиле: тохта, къара, тынгыла, сагъыш эт, артда ёт жолдан,-деп ангылатхандыла инспекторла.  

 - Быллай жумушла биз таматалагъа жолда сабийле  кеслерин сакълаялмагъанларын, ала бизден юлгю алгъанларын эсгертирге болушадыла,-дегенди КъМР-де МВД-ны Жамауат советини башчысы Руслан Маргушев акциядан сора.