«Бызынгы» лагерьде кёпюр жангыртыллыкъды

Республикагъа ишчи жолоучулугъуну кезиуюнде Россейни экономиканы айнытыу министрини орунбасары Сергей Назаров, «Кавказ РФ» обществону генеральный директору Хасан Тимижев, республиканы Правительствосуну Председатели  Мусукланы Алий, курортла эм туризм министри Мурат Шогенцуков бла бирге «Бызынгы» альпинист юйретиу-спорт базада болгъандыла, деп билдиредиле обществону пресс-службасындан.

Лагерьни башчысы Аналаны Алий бла тюбешиулеринде ала базагъа транспорт бла чурумсуз келиуню амалларын, аны газ бла жалчытыуну юсюнден сорууланы сюзгендиле. Аналаны Алий объектге таматалыкъны 1995 жылдан бери этеди. Ол билдиргенича, спорт базагъа элтген кёпюрге эрттеден бери да ремонт этерге керекди.  Былайны газ бла жалчытыу а  туризмни айнытыргъа себеплик этерик эди.  Бииеу алып айтханда уа,  инфраструктура  айныпды: адамланы сыйындырырча жерле жетишедиле, китапхана, таш къала-музей бардыла.

Сергей Назаров белгилегенича, Бызынгыгъа материалланы  бла техниканы келтирген алай тынч болмагъанлыкъгъа, альпинистлеге, таулада солургъа келген туристлеге да тынгылы онгла къуралгъандыла. «Кёпюрню юсюнден айтханда, регион властьла бла бирге аны жангырытыуну, ахча бёлюу  эм ишлени къурау бла байламлы  соруулагъа къарарыкъбыз», - дегенди ол.