Онкология диспансерни къурулушу жангыдан башланнганды

Эсге сала айтсакъ, 2013 жылда бу объектде ишлени бары да тохтатылгъан эдиле. Ол кеси да тийишли федерал программа тыйылгъаны бла байламлыды. Алай 2019 жылда уа, КъМР-ни Башчысыны Казбек Коковну башламчылыгъы бла объектни проект документациясын тюрлендириу башланнганды. Нек дегенде, аллай саулукъ сакълау мектеплени къурулушуна излемле ол кезиуден бери иги да тюрленнгендиле.

Алай бла буруннгу жыл жангы проект жарашдырылгъанды. РФ-ни саулукъ сакълау министри Михаил Мурашко бла бир ненча кере тюбешгенинде Казбек Коков ол объектни жангыдан ишлеп башлар амалланы юсюнден сёлешген эди. Проектни министерство да дурус кёргенди. РФ-ни  Президентини СКОФ-да толу эркинликли келечиси Юрий Чайка да себеплик этгенди анга. Былтыр а проектни Федерал энчи инвестициялы программагъа къошхандыла.

Диспансерни къурулушун башларгъа деп быйыл республикагъа 600 миллион сом берилгенди. Саулай айтханда уа, проектни толусунлай тындырырча федерал бюджетден 4,5 миллиард сом жиберилликди. Объект хайырланыугъа 2025 жылда берилирге керекди.

Айтханыбызча, проект санитар-эпидемиология мардалагъа бла излемлеге келиширча тюрлендирилгени себепли шёндю ол жарты ишленип къалгъан объектни талай жерлерин оюп кетере турадыла. Жангы диспансер а башха-башха къатлы талай багъыу  блокладан къураллыкъды. Барында да саусузлагъа 250 жер боллукъду. Дагъыда бир сменнге жюз адамгъа къарар онглары болгъан поликлиника да ачыллыкъды.

Бу ишни юсюнден КъМР-ни саулукъ сакълау министри Рустам Калибатов былай айтханды: «Жангы проектге кёре къошакъ халда энтта да «Д» багъыу  блок ишленирикди. Алгъын документацияда  ол жокъ эди. Анда операцияла бардырыллыкъ, реанимация этиллик бёлюмле, жангы излемлеге келишген диагностика кабинетле орналлыкъдыла. Дагъыда радиология корпус ишленирикди. Анда уа эм жангы оборудование боллукъду. Шёндю хайырланыуда болгъан диспансерде биз буруннгу жыл дозиметрия бла топометрия системалары болгъан эмда лучевой терапия этген комплекс орнатхан эдик. Аны да жангы диспансерге кёчюрлюкбюз. Андан сора да радиохирургия эмда томотерапия комплексле да боллукъдула анда. Жангы диспансер онкология аурууладан къыйналгъанлагъа бютюнда тынгылы медицина болушлукъ берирге себеплик этерикди».