Къошакъ халда ырысхы бёлюннгенди

Озгъан жылда жангы коронавирус инфекциялы ауруу жайыла баргъан кезиуде медицина болушлукъну тапдырыу, саусузланы ковидден багъыу бла байламлы  къошакъ халда этилген ырысхы къоранчла эм къоркъуулу инфекциялагъа бакъгъан госпитальлагъа бурулгъан медицина организациялада бир жылгъа къоратыллыкъ ырысхыны ёлчемин ёсерча этгенди. 2021 жылны ноябрь-декабрь кезиуюнде коронавирусдан къыйналгъанлагъа этилген медицина болушлукъ ючюн тёленмеген счётла 798,6 миллион сомгъа жетгендиле, ол а саулукъ сакълау учрежденияланы кредит борчларын кёбейтгенди.

Саулукъ сакълау системаны финансла жаны бла тутхучлулугъун сакълар эмда къырал медицина организациялада жууаплылыкъны толтурууну жалчытыр  муратда Къабарты-Малкъар Республиканы Башчысы Казбек Коков, бир ненча кере РФ-ни Саулукъ сакълау министерствосуна, медицина жаны бла къорууланыуну федерал фондуна, РФ-ни Федерал Жыйылыууну Федерация Советине, Шимал-Кавказ федерал округда РФ-ни Президентини толу эркинликли келечисине этилген медицина  болушлукъну къоранчларын компенсациялаугъа борчлу медицина страхованияны чеклеринде къошакъ халда ырысхы бёлюуню онгларына къарарларын тилеп, къагъытла жибергенди.

РФ-ни Президентини Шимал - Кавказ федерал округда толу эркинликли келечиси Ю.Чайканы бла Федерал Жыйылыууну Федерация Советини Председатели В. Матвиенкону тутхучлулукъ этиулери бла (14.07.2022 ж. № 1914-р) РФ-ни Правительствосуну резерв фондундан 990904,1 минг сом ёлчемде ырысхы  бёлюннгенди, ол санда Къабарты-Малкъарны бюджетине-798693,3 минг сом эмда Къарачай-Черкес Республикагъа-192210, 8 минг сом.

Бюгюнлюкде сагъынылгъан ырысхы болушлукъ энди республикагъа келгенди эмда кредит борчланы, иш хакъланы тёлерча, бирси керекли къоранчлагъа да хайырланылырча саулукъ сакълау организацияланы лицевой счётларына юлешиннгенди.

КъМР-ни   Саулукъ сакълау министерствосуну пресс-службасыны таматасы.