Ахчаны кеси жумушларына къоратханды

Къурулуш материалла сатылгъан тюкенни ишчиси 150 минг сом багъасы товар урлагъанына ишеклилик  барды.

Бахсанны полициячыларына шахарда тюкенледен бирини иеси тарыкъгъанды. Аны айтханына кёре, ол товар азайгъанына эс буруп, тинтиу бардыргъанды. Аны кезиуюнде уа обоину жабышдыргъанда хайырланнган клейни 15 пачкасы бла 16 обоиланы рулон жетишмегени ачыкъланнганды. Аланы битеулю багъасы 150 минг сомгъа жетеди.

Уручулукъну этгенине алгъын да сюдню оноуу бла жууапха тартылгъан 34-жыллыкъ сатыучугъа ишекли болгъандыла. Полицияны участка уполномоченныйлери, тийишли мадарла бардырып, товарны ол алгъанын тохташдыргъандыла. Тюкенчи этген терслигине женгдиргенди. Ол айтханыча,   эки ыйыкъны ичинде товарны жашырын тюкенден чыгъарып,  сатып тургъанды. Ахчаны уа кеси кереклерине къоратханды.

Бу шартла бла байламлы РФ-ни УК-сыны 158-чи статьясына кёре уголовный иш ачылгъанды. Тиширыу этген къоранчны бир кесегин тюкенни иесине къайтаргъанды.