Эл жерлени бла гитче предпринимательстволукъну айнытыргъа алланып

РФ-ни Эл мюлк министерствосу бардырып   Нальчикде ведомствону  семинар-кенгеши ишин  башлагъанды. Ол комплекс халда эл жерлени эм жерчиликде уруннган гитче предпринимательлени айнытыугъа жораланнганды.    Анга Шимал Кавказны бла  Юг федерал округланы агропромышленный комплекслерини келечилери къатышадыла. 

Жыйылыуну ача, Россейни эл мюлк министерствосуну эл жерлени айнытыу бла байламлы департаментини таматасыны орунбасары Ренатак  Бибарсова семинарны ишине къатышханлагъа министр Дмитрий Патрушевни  сёзюн окъугъанды. Анда  къыралны инсанларыны  тёртден бири  элледе жашагъаны, ол себепден аланы болумларын игилендириу баш борчладан бири болгъаны  айтылгъанды.

КъМР-ни эл мюлк министри Хасан Сижажев  агропромышленный комплекс бёлюмню  айнытыуда  быллай конференцияланы    магъаналылыкъларын  чертгенди. 

- Буруннгу жылда къабыл этилген «Комплекс халда эл жерлени айнытыу» къырал программа бюгюнлюкде уллу социал магъаналыгъын кёргюзтгенди.  Эл айнымаса  къыралны аш-суу бла къоркъуусузлугъун жалчытхан агропромышленный комплексни да  толу кюч бла ишлетирге къыйын  боллукъду,-дегенди ол.
Эсге сала айтсакъ, бюгюнлюкде Къабарты-Малкъарда жамауатны элли  проценти элде жашайды. Ол себепден аны  айнытыу бизни  регионнга бютюн магъаналыды.  Къырал программаны себеплиги бла  жыл сайын муниципалитетледе инфраструктураны игилендирирге онг табылыды. Сёз ючюн, 2020-2021 жыллада таза суу бла жалчытхан водозабор бла  эки скважина ишленнгендиле. Эки элде школгъа бла сабий садха, Маданият юйге  тынгылы ремонт этилгенди эм эки ГАЗель улоу сатып алыннганды. Чыракъ  чыпынла тартылып орамла кече жарыкъ болурча мадар да этилгенди.

Аны бла бирге буруннгу жылда алты элде социал магъаналы объектле  орналгъан   орамлагъа  къаралгъанды. Былтыр а кёпюр  бла жол жангыртылгъанды. Саулай алып айтханда, сагъынылгъан ишлеге  бюджетден бёлюннген 916 миллион сом къоратылгъанды.
Быйыл программаны чеклеринде Прохладна районда спорт комплексни къурулушу барады эм бир къауум  элде да таза суу бла жалчытылынырча мадарла  излегендиле.  Солдатскоеде жангы школ хазыр болгъандан  сора 140 сабийге сабий деп садны къурулушу башланнганды.  Жылны ахырына энтта  тогъуз элни ара орамларына тынгылы ремонт этилликди.
 Семинарны чеклеринде эл жерлени айнытыу бла байламлы  тюрлю-тюрлю тематикалагъа жоралап  «тёгерек столла» ётерикдиле.