Эл мюлкде жангы амалланы сюзгендиле

Бу кюнледе   РАН-ны КъМР-де илму арасында  «Эл мюлкде жумушланы тамамлауда роботланы эм техника комплекслени хайырланыу» деген темагъа регионла аралы кенгеш  ётгенди.  Анга Москвадан, Кърымдан, Ингушетиядан да алимле къатышхандыла. Эки кюнню ичинде ала, белгиленнген темагъа кёре  жангылыкъланы белгилеп, ол затланы  жашауда къалай хайырланса тап боллугъун сюзгендиле.

Кенгешни биринчи кюню Магас шахарда ётгенди. Экинчи кюн а делегация Къабарты-Малкъаргъа келгенди. Бек алгъа аланы регионда аграр  комплексде хайырланыргъа боллукъ роботланы кёрмючю бла шагъырей этгендиле. Информатиканы эм регион управленияны жарсыулары жаны бла институтну  таматасыны къуллугъун толтургъан Кантемир Бжихатлов къонакълагъа кёрмючдеги экспонатланы юслеринден хапар айтханды.

Ызы бла кенгешге къатышханла аны «Проект организации соревнований по разработке и применению сельскохозяйственной робототехники и систем искусственного интеллекта» деген темагъа докладына тынгылагъандыла.  Араны къуллукъчусу Мадина Канокова уа тюкенледе хайырланыргъа боллукъ роботну юсюнден хапарлагъанды. Андан сора машиналаны жуугъан жерледе салырча энчи мойка бла да шагъырей этгенди. 

Алимлени алларында ол кюн  РАН-ны КъМР-де илму арасыны таматасы Залимхан Нагоев сёлешгенди.  Ол, бардырылгъан жыйылыуну магъаналыгъын чертип, бу ишге жаш тёлюню аслам сейирсиндирирге кереклисин белгилегенди.