Усталыкъларын юйрениуледе ёсдюредиле

Нейтрино обсерваторияны тийресинде от ёчюлтюучюлени  кезиулю юйрениулери ётгенди.   Къыйын жалгъан болум от ёчюлтюучю службаны тамата эм энчи къауумларыны билимлерин ёсдюрюу мурат бла къуралгъанды.

Сценарийге кёре, от 2-чи  этаждагъы кабинетлени биринде электропроводканы жаннганыны хатасындан  тюшгенди. Анда уруннганла  болумну юсюнден от ёчюлтюучюлеге мычымай билдиргендиле. Ызы бла уа анда ишлегенлеге да билдириу этгендиле. Къутхарыучула келгинчи ала кеслери алларына тизилип объектден чыкъгъандыла.

От ёчюлтюучюле келир заманнга от 60 квадрат метрден 100-ге дери жайылгъанды. Къутхарыучуладан таматасы, жумушну ахырына жетдирир ючюн, болушлукъ чакъырыргъа оноу  этип,  от тюшюуге  экинчи ауурлукъ категорияны береди.

От ёчюлтюучюле уа,  солууларын къоруулагъан затланы хайырланып, жалгъан къыйын болумгъа тюшген адамны  къутхарадыла. Бирден  къадалып, ала ёртенни  жайылыргъа къоймай ёчюлтедиле.

Жалгъан от тюшюуню кетерирге  Элбрус районну  10-чу эм 26-чы ПЧС-ни къутхарыучулары  къатышхандыла.  

- Салыннган борчну  къаууи тийишлисича  толтургъанды , - деп белгилегенди ахырында  службаны башчысыны орунбасары Аслан Дзамихов. 

Быллай юйрениуле, сёзсюз, от ёчюлтюучюлени усталыкъларын ёсдюрюуге, аланы къыйын болумда абызырамауларына себеплик этедиле.