Файда да жокъ, жангы таныш да жокъ

КъМР-де МВД-ны уголовный розыскыны къуллукъчулары хыйлачылыкъ этгенине ишекликде тиширыуну тутхандыла. Ол башханы алдап, 683,5 минг сом къоллу болгъанды.

Былтыр 21 февральда Нальчикде УМВД-гъа 62-жыллыкъ тиширыу тарыгъып келгенди. Аны айтханына кёре, ол  жылны аллындан бери социальный сетьледен биринде танымагъан тиширыу бла ушакъла бардырып тургъанды. Аланы кезиуюнде терсленнген инвестиция компанияладан бирине ахча салып, алай бла уа файда къоллу болургъа чакъыргъанды. Байлыгъын кёбейтирге ыразы болуп, нальчикчи тиширыу жангы танышына 683,5 минг сомну ашыргъанды. Алай бир кесек замандан а «консультант» анга жууапла бермей  тохтагъанды.

Бу шартла бла байламлы РФ-ни УК-сыны 159-чу статьясыны 3-чю кесегине кёре терслеу материалла ачылгъан эдиле.   Тийишли тинтиу жумушланы кезиуюнде полициячыла хыйлачылыкъны этгенине ишеклини ачыкълагъандыла. Ол Ставрополь крайдан 56-жыллыкъ тиширыуду. Ол этген аманлыгъына женгдиргенди.