Сабийлеге – Минги таугъа жолоучулукъ

Бу кюнледе Къабарты-Малкъарда «Курорт Нальчикде» Херсон областьдан 17 сабий солугъандыла, алагъа Минги таугъа экскурсия къуралгъанды.

Гитчеле, аланы биргелерине болгъанла да Гарабаши станциягъа жетгендиле, Элбрусну жууукъдан кёргендиле. Къонакъла, ариу табийгъатыбызгъа къарай, зауукълукъ алгъандыла, республиканы тарыхыны, Минги таугъа биринчи ёрлеген адамланы юслеринден сейир хапарлагъа тынгылагъандыла. Нарзан талада уа гара сууладан да ичгендиле. Артха арып, аны бла бирге уа кёллери кётюрюлюп, къууанып къайтхандыла, мында кёргенлери аланы эслеринде кёп жыллагъа къаллыкъды. Республикада ала кёп жангы тенгле тапхандыла, юйлерине уа саугъала да алып къайтхандыла.

Жолоучулукъ республиканы Курортла эм туризм министерствосуну, «Кавказ.РФ» обществону, «Грушевая роща» санаторийни эм «Иткол» къонакъ юйню себепликлери бла къуралгъанды.