Ариу байрам къурагъандыла

Бу кюнледе Май районну администрациясыны аллында майданда КъМР-ни 100-жыллыгъына аталып байрам болгъанды. Аны Александровская станицада «Октябрь» маданият юйню директору Кулистон Голбунинская къурагъанды.

Ол кюн анда 60-70 жыл мындан алгъа басмадан чыкъгъан малкъарлы жазыучуланы китапларындан кёрмюч да болгъанды. Бизни журналларыбызгъа бла «Заман» газетге жаздыргъанлары себепли, маданият юйде ишлегенле аладан да стенд къурадыла. Миллет ашарыкъларыбызны байрамгъа келгенле билирча этгенле Къазакъланы Мариям, Атмырзаланы Элеонора, Акъболатланы Альбина бла къызы Салима, Ангелина Долгова къолдан келгенлерин аямагъандыла.

Май районда жашагъан корейлиле, къабартылыла, тюрклю мехсетинлиле, къазакъла да миллет ашарыкъларын, маданиятларын да кёргюзтгендиле. Майданда къуралгъан хар къошха районну администрациясыны башчысы Татьяна Саенко, аны орунбасары Ольга Бездудная, маданият бёлюмню таматасы Юлия Пуртова къарагъандыла, алагъа малкъарлы жазыучуланы китапларын да саугъа этгендиле.

Байрамда шахарны художестволу школунда юйреннген сабийле сурат этиуде  фахмуларын кёргюзтгендиле.  Андан сора «Россия» маданият юйде школчуланы авиамодельле этерге юйретген Сергей Чумак «Кесинги билимингден юлюш эт» деген акцияны чегинде ол жаны бла хунерлери болгъан сабийле бла байрамгъа келгенлени шагъырей этгенди.

Элде ётген жарыкъ байрам кюн салкъын болгъанда башланып, кече арасына дери баргъанды.