Кеф кесине, тёгерегинде адамлагъа да къоркъууду

Машинаны кеф болуп жюрютгенлери ючюн уголовный жууапха тартылгъанла къыралавтоинспекторла эмда УФСИН-ни келечилери бла тюбешгендиле.

 Эсирип, жолгъа чыкъгъан водительле жолда жюрюуге къатышханланы саулукъларына, жашауларына уллу къоркъуу саладыла. Бу аманлыкъланы профилактикасына ол себепден артыкъда уллу магъана бериледи.

  Право низамны сакълаучула жолда жюрюуню жорукъларына дайым да бузукълукъла не сылтау бла этилгенлерин билдиргендиле. Тюбешиуге къатышхан водительлени жууаплылыкъны ангыларгъа чакъыргъандыла. Кеф адамны хатасындан аварияла бютюнда ауур болгъанларын ангылатхандыла.

- Кеф болуп, жолгъа чыгъыу  эм ауур бузукълукъладан бириди. Эсирген водитель кесини жашаууну, тёгерекде адамланы къоркъуусузлукъларыны юслеринден сагъыш ахырда этмейди. Быллай уллу кёллюлюкню хатасындан аварияла боладыла, алада адамла ачыйдыла, ауушханла да аз тюйюлдюле,-дегендиле жыйылыуну къурагъанла.

 Тюбешиуге къатышханла, инспекторлагъа соруула берип, алагъа тынгылы жууапла алгъандыла.