Жайны иссилиги - адамны чархына уллу сынауду

Артыкъда адам гипертониядан неда диабетден ауруй эсе, къыйынлыкъ келмезча къалай этерге боллукъду?

Ол соруугъа  экспертле былай жууаплайдыла:

Гипертония

Артыкъда исси кезиуледе кёп боладыла инсультла, инфарктла эм гипертоникалы къытлыкъла. Аны ангылагъан къыйын тюйюлдю. Терсуу болуп адамны санындан суу эм  минерал тузла кёп кетедиле, аны хатасындан къан къалын болады.

Ол а жюрекге ауурлукъну кёбейтеди, тамырлада къанны уютуп, токалчыкълагъа этерге боллукъду.

Къоркъуусузлукъну жорукълары:

Суусун затланы ичерге къоркъмагъыз. Кёп эшитирге боллукъду исси кюнледе гипертониклеге бир литрден кёп суу ичерге жарамайды деген сёзлени. Алайды эти кёбюучю эм жюреклери ауруучу адамланы алып айтсакъ. Башха болумлада уа кюннге 2 литр суу ичерге керекди, исси кюнледе уа  3 литрни окъуна. Жаланда сууукъ болмасын - ол жюрекге ауур боллукъду. Ичер затларыгъызны сууукълукълары юйню хауасыны температурасыча болсунла. По¬мидор суу эм суу къошулгъан жемиш суула, гара суула, айран иги жалчытадыла суусапны, адамны чархында сууну, тузланы да кереклиси чакълылай тутадыла.

Саныгъызгъа ауурлукъ сынатмагъыз. Ауур ишлени эрттенлик неда ингир салкъынлада этерге кюрешигиз. Бек исси кюнледе гипертоникле сагъат 11-ден башлап 19 сагъатха дери тышына чыкъмасала игиди, артыкъда адамладан толу транспортха минмезге керекдиле. Кондиционер жокъ эсе, юйню жыяма деп кюрешмегиз, плитаны къатында да турмагъыз. Солугъуз бир кесек, къол иш бла кюрешигиз неда телевизоргъа къарагъыз.
Иссиленсегиз, сууукъ душ керек тюйюлдю. Иссиликни сууукъ бла алышындырыу (10*С) къан тамырланы къысдырыргъа боллукъду, ол а болумну бютюнда осалландырлыкъды. Душ жылы болсун, андан чыкъгъандан сора юсюгюзню жан жаулукъ бла сыйпамагъыз - теригизден суу кеси къуруп кете барса, саныгъызны сууутурукъду.

Тузну хайырланыуну азайтыгъыз, ол санда жашырынлыкълада болгъанларын хайыр¬ланыуну да - ала къыймалада, консервалада, жарым фабрикатлада болуучудула. Кофени, кючлю чайны, эсиртиучю ичгилени, тютюнню да къоюгъуз.

Диабет

Майо деген америкалы клиниканы алимлери диабетден ауругъанлагъа кюйдюрюрге жетдириучю иссиликни къой да, башха адамла эсге алмагъан 26-29 градус иссилик окъуна къоркъуулуду, дейдиле. Диабет¬ден ауругъанла бек терлейдиле, адамны чархы сууну терк тас этеди. Аны хатасындан а къанда бал туз  терк кёбейеди эм аурургъа боллукъду.

Болум бютюнда осалланады исси кюнледе инсулин эм диабетге къажау хайырланыучу башха дарманла дарманлыкъларын терк тас этгенлери бла. Аны бла бирге диабетден ауругъанланы терилери кюннге бек тёзюмсюз боладыла. Ала кюннге бек терк кюедиле, аны хатасындан жугъуучу аурууладан да башхаладан эсе кёп ауруйдула.

Къоркъуусузлукъну жорукълары:

Суусун затланы мардасы бла ичигиз. Исси кюнледе уа диабетикле сууну гитче уртламла бла терк-терк сагъатны ичинде 3-4 кере ичселе игиди.

Иш бла байламлы эшикге чыгъаргъа керек болса уа, къаныгъызда глюкозаны тийишли мардада жалчытырыкъ дарманланы биргегизге алыгъыз. Аланы сууукъну жалчытыучу контейнерчикледе, бир да болмаса, аллай хуржунчукълада тутугъуз. Аллай дарманланы юйде холодильникде тутаргъа боллукъду бузлатмазча тапкасында.

Кюнде кёп турмагъыз (жюрюмегиз), салкъын жерле бла жюрюгюз. Женгил, хауаны тыймагъан, аны бла бирге инбашларыгъызны, билеклеригизни жапхан кийимлени кийигиз. Алай эсе да, эсигизде болсун - кийимле ультрафиолет таякъладан сизни 100 процент къоруулаялмазлыкълары. Кюн таякъладан къорууларыкъ SРF кремни жагъып чыгъыгъыз тышына, бир кесекчик турлукъ эсегиз да кюнде.

Дауутланы Сафият хазырлагъанды.
Поделиться: