Тиширыуланы башламчылыкъларына себеплик этилликди

«Единая Россия» партия Россейде эм Донбассда тиширыулагъа себеплик жаны бла комитет къурагъанды. Аны ишине партияны баш советини таматасыны орунбасары Дарья   Лантратова жууаплыды.

Аны айтханына кёре, «Единая Россияны» мурдорунда тиширыуланы комитети Россейде бла Донбассда этилген башламчылыкъланы тамамларгъа болушурукъду.  Сёз тиширыулагъа бла сабийлеге медицина, психология, билим бериу себепликни юслеринден барады.

-  Донбассда тиширыула къаллай къыйынлыкъла сынагъанларын барыбыз да билебиз. Ала   жашагъан жерлеринде мамырлыкъны тохташдырыуда къолдан келгенни этедиле. «Единая Россия» энчи операцияны биринчи кюнлеринден регионда   жашагъанлагъа болушлукъ этгенлей келеди. Болсада жандауурлукъ жумушланы чеклеринде къарындаш республиканы халкъына болушлукъгъа бурулгъан проектлени жарашдырыргъа тийишлиди,- дегенди Дарья Лантратова тиширыуланы советлерини, биригиулерини, жамауат, коммерциялы болмагъан, волонтёр организацияларыны Дондагъы Ростов шахарда   тюбешиулеринде.

 Ол билдиргенича, Тиширыуланы комитети  билим бериу, юйретиу программала хазырларыкъды, тиширыуланы иш бла жалчытыу, солуу заманларыкъ къурау жаны бла мадарланы да толтурлукъду. Дагъыда Донбассда социал предпринимательствогъа себеплик этилликди.  

«Донбассны тиширыуларыны союзуну» башчысы     Наталья Приймак айтханыча, регионда проектлени тамаларгъа хазырдыла.  Ол таматалыкъ этген организация 2021 жылда  ишлеп башлагъанды. ««Единая Россияны» болушлугъу бла  Донбассда социал предпринимательство тириллигине ишексизме»,-дегенди ол.

Тиширыуланы комитетини мурдорунда клубла къураллыкъдыла.  «Биз тиширыуланы бирикдирир муратлыбыз, аланы жандауурлукъ башламчылыкъларын жашауда бардырыр ючюн. Ма бюгюн да  дарманла алып келгенбиз – тоннагъа жууукъ. Аны Луганскда Экстренный медицинаны арасына берликбиз,-дегенди бир журтлулагъа социал-культура башламчылыкъланы «Русская земля» жандауурлукъ фондуну таматасы  Анна Данилова.

Жыйылыугъа къатышханла кеслерини проектлерини юслеринден айтхандыла. Ала ёксюз  сабийлеге болушлукъ, саулукъларына кёре чекленнген онглары болгъанлагъа реабилитация, билим бериу эм башха магъаналы жумушла бла байламлыдыла. 

 Тюбешиуде «Амманы къайгъырыуу» битеуроссей партия акция да башланнганды. Тамата тёлюню келечилери жылы кийимле эшип, аланы  къагъанакъ  сабийлеге юлеширикдиле.  «Бюгюн биргебизге келтирген жылы чындайланы, ёрге жанланы Донецкге эм Луганскда сабийлеге берликбиз»,-дегенди   Екатерина Стенякина.

 РФ-ни Къырал Думасыны КъМР-ден  депутаты   Виктория Родина партияны республикада регион бёлюмюню пресс-службасына айтханыча, (kabardin-balkar.er.ru)  быллай комитетни къурау магъаналы башламчылыкъды.

- Тиширыу юйню мурдор ташыды. Болсада шёндюгю заманда тиширыула къыралны жашаууна эр кишиле бла тенг  къатышадыла, ол санда къырал магъаналы сорууланы тамамлаугъа.    Партия аналаны жарсыуларына не заманда да энчи эс бургъанды. Росссейде бла Донбассда алагъа болушлукъгъа проектлени бардырыу  да бу ишни магъаналы кесегиди.  Тиширыуланы бирикдирген, аланы сейирлерин сакълагъан организация аналагъа бла сабийлеге медицина болушлукъ бериу, саулукълары осал болгъанлагъа болушуу, билим бериу программаланы тамамлау, социал предпринимательствону тирилтиу дегенча магъаналы сорууланы жашауда бардырыугъа себеплик этерикди. Бу комитет жамауатны айнытыу, юйюр тёрелени сакълау жаны бла башламчылыкъланы жашауда бардырыргъа сюйген тиширыулагъа уллу болушлукъ боллугъуна ишексизме,-дегенди депутат.