Республикада бёлюмде – эм кючлю спортчула

«РусГидро» обществону республикада бёлюмюню къаууму «Юг» кесегини спартакиадасында хорлагъанды. Эришиулеге Дагъыстанда, Къарачай-Черкесде, Шимал Осетия-Аланияда, Кубаньда эм талай башха бёлюмледен 110 спортчу къатышхандыла, ала эки кюнню ичинде футбол эм стол теннис ойнап, женгил атлетикада бла жюзюуде сынашхандыла.

  Эркин амал бла 50 метрге жюзюуде биринчи жерни персонал жаны бла специалист Будайланы Зульфия алгъанды. Эр кишилени араларында экинчи жерге Бахсанда ГЭС-ни оператив службасыны башчысыны орунбасары Азамат Бугов чыкъгъанды. Стол теннисде, эм кёп очко алып, инженер Эльмира Пшихачева къытханды. Финансла-экономика бёлюмню баш специалисти Татьяна Аккуева 100 метрге чабыуда эм терк болгъанды, машинист Аслан Шогенов а «доммакъны» алгъанды. Узун дистанциягъа – 3000 эм 2000 минг метрге чабыуда «кюмюшле» бла финансла-экономика бёлюмню специалисти Марина Хужокова бла инженер Мурат Канкулов саугъаланнгандыла. Ала энди Сочиде юг регионну атындан эриширикдиле.

  Эсгертиу: обществону бёлюмлерини алларында спартакиада ишчилени саулукълу жашау бардырыргъа, физкультура бла дайым кюреширге кёллендирир эм кючлю спортчуланы ачыкълар муратда бардырылады. Айырыу эришиуле «Сибирь», «Узакъ Восток», «Волга» эм «Ара» филиаллада да ётдюрюлгендиле. Финал сынаула кюзде боллукъдула, деп билдиредиле обществону пресс-службасындан.

Кульчаланы Зульфия.
Поделиться: