Сабийлени къоркъуусузлукъларын жалчытыугъа бурулупду

 Жолда жюрюуню къоркъуусузлугъу жаны бла комиссияны кезиулю жыйылыуунда   сабийлени къатышыулары бла аварияланы азайтыуну мадарларыны юсюнден баргъанды сёз. Кенгешле Май эм Лексен районлада болгъандыла. Алагъа районланы бла эллени администрацияларыны келечилери, школланы директорлары да къатышхандыла. Ала  республикада аварияланы сылтауларын сюзгендиле, жоллада низамлыкъны жалчытыуну мадарларына къарагъандыла.

Сёз устазла окъуу кезиуде сабийле юйден школгъа келгенлеринде эм артха къайтханларында болумну тинтип турургъа, ата-анала бла ангылатыу ушакъла бардырыргъа, ала сабийлерини жашаулары ючюн жууаплы болгъанларын билдирирге кереклисини юсюнден да баргъанды. «Ата-ана патруль» къураргъа башламчылыкъ да этилгенди. Ол сабийлени жолда ачыгъанларын азайтыугъа себеплик этериги да айтылгъанды.

Жолда жюрюуню жаш инспекторларыны (ЮИД) отрядларыны ишлерин тирилтиуню, жууаплы ведомстволаны араларында байламлыкъланы игилендириуню, билим бериу учреждениялада  «Юй-Школ-Юй» маршрутланы къурауну, алада сабийге къоркъуусуз жолну ангылатыуну мадарлары да белгиленнгендиле.