Ариу юлгю кёргюзтюрге чакъыргъандыла

«Каникулла. Жол. Сабийле» ангылатыу мадарланы чеклеринде РФ-ни МВД-сыны Черек районда бёлюмюню акъылбалыкъ болмагъанланы ишлери эмда жолда жюрюуню къоркъуусузлугъу жаны бла инспекторла водительле бла ушакъла бардыргъандыла.

- Солууну кезиуюнде сабийлени жашауларына, саулукъларына къоркъуу болмаз ючюн жорукъланы сакъларгъа керекди. Дагъыда кече адамла жолда билинирча мадарла да магъаналыдыла, - дегендиле полициячыла рейдни аллында.

Алай бла право низамны сакълаучула Бабугентде жолда сюелгендиле. Ала былайтын баргъан транспортну тохтатып, водительлеге сабийни къоркъуусуз бау бла къысаргъа, энчи шинтикчиклени хайырланыргъа кереклисин ангылатхандыла. Дагъыда ата-аналагъа сабийлерине жолда жюрюуню жорукъларын юйретирге жууаплы болгъанларын да айтхандыла.

Рейд кече бардырылгъанды. Алай бла уа полициячыла водительлеге кече къарангыда жолда адам кёрюнмегенин, аны эслеген къыйын болгъанын эсгертгендиле. Ингирде сабийни жашаууна къоркъуу болмаз ючюн а светоотражательлени хайырланыргъа, жарыкъ кийимлени кийдирирге кереклисин да белгилегендиле.

Ахырында полициячыла таматаланы ёсюп келген тёлюге ариу юлгю кёргюзтюрге, машинаны ичинде къоркъуусуз бауланы тагъаргъа чакъыргъандыла.