Бир классда окъугъандыла, фронтха бирге кетгендиле

Гажонланы Кёккёзню жашы Солтан-Хамит бла Чеченланы Хажини жашы Хусей бир жыл туугъандыла, ала экиси да Къашхатауну орта школунда бир классда окъугъандыла. Аскерге экиси да кеслерини ыразылыкълары бла бирге кетгендиле – уруш башланнганы белгили болгъаны бла экинчи кюнде.

Жашланы Орджоникидзеде (шёндюгю Владикавказ) жаяу аскер училищеге жибередиле. Алай окъууну бошаргъа тюшмегенди алагъа, кичи командир чынла берип, шуёхланы фронтха ашырадыла. Таулу сержантла – автоматчиклени роталарында бёлюмлени командирлери - Сталинград таба ал ургъан фашист аскерле бла къанлы сермешлеге киргендиле. 

Солтан-Хамит 1942 жылда жаралы болуп, кесине Кисловодскеде бакъдыргъаны белгилиди. Ол андан чыкъгъанда, анасы бла тюбешген эди. Андан жаш артда фронтха къайтады. Артда ол письмоларында танкда къуллукъ этгенин жазгъанды, танкчыны формасында суратлар да жиберген эди анасына.

Ахыргъы письмосунда уа танкланы платформалагъа жюклегенлерин, эшелон тебирерге бир ненча минут къалгъанын, алай къайры элтгенлерин а билмегени жазгъанды ол. Артда белгили болгъаныча, Гажон улу къуллукъ этген танк дивизия Сталинграддан  Курс дугагъа кёчюрюлгенди.  Солтан-Хамит 1943 жылда июльда Прохоровканы тийресинде болгъан танк сермешледен биринде жоюлгъанды.

Нёгерледен экинчиси Чеченланы Хусей Хорламгъа гитлерчилени уясыны тийресинде Германияда Лейпциг шахарда тюбегенди. Ол фронтда эки кере жаралы болгъаны белгилиди. Тамата лейтенант Чеченланы Хусей Украинаны, Польшаны эркин этиу сермешлеге къатышханды, душманны уясында жокъ этиу къазауат бардыргъанды.   Фронтда кёргюзтген батырлыгъы ючюн ол Къызыл Жулдузну эмда Ата журт урушну орденини 1-чи даражасы, «Кишилиги ючюн», «За боевые заслуги», «Германияны зорлагъаны ючюн» майдалла бла саугъаланнганды.

 

Тикаланы Фатима хазырлагъанды.
Поделиться: