Хорламны таякълары Нальчикде да жанарыкъдыла

Нальчик 1945 жылда Хорламны парадыны 77-жыллыгъына аталгъан битеуроссей акциягъа къатышады. Ол аскер махтаулукъну битеу шахарларында бардырылгъанын айтырчады.

Бу сыйлы жыйылыугъа къатышханлагъа «В бой идут одни старики» кино кёргюзтюллюкдю. Ахырында уа 22 сагъатда Къозу тереклени бахчасында «Аскер махтаулукъну шахары» эсгертмени къатында аталарыбызны, аппаларыбызны, къарт аппаларыбызны жигитликлерини хурметине иллюминация къураллыкъды.

Эсигизге салайыкъ, 1945 жылда 24 июньда Хорламны Парадына аталып, Москва жарыкъ чыракъла бла жасалгъан эди. 23 сагъатда уа къыралыбызны ара шахарыны кёгюн беш прожектор жарытханды: Кремльни тёгерегинде, Бульварный эм Садовый орамланы эмда Окружной темир жолда вокзалланы тийрелеринде.

Ол къууанчлы кюнледен 77 жыл озгъандан сора Хорлам ючюн жанларын берген жигитлени хурметине битеу къыралда да кечеги кёк жарыкъ боллукъду.

Эсгериу жумушлагъа къатышыргъа сюйгенлени аллай онглары барды.

Ала 24 июньда 20 сагъатда 30 минутда башланырыкъдыла.

Хурмет ишле Нальчикде Къозу тереклени бахчасында «Аскер махтаулукъну эсгертмесини» къатында боллукъдула.

Тарыхыбызны ёмюрлеге сакъларгъа борчлубуз.